शिक्षा विभागक आदेशक अनुसार सभ प्राथमिक आ माध्यमिक विद्यालयक संचालन भोर 6:30 बजेसँ अपराह्न 12:30 बजे धरि होयत। 7 अप्रैलसँ एक जून धरिक लेल ई बदलाव कएल गेल अछि।
बिहारक तापमान धीरे-धीरे बढ़ि रहल अछि। एहि बात पर ध्यान दैत राज्य सरकारक शिक्षा विभाग सरकारी स्कूलक टाइमिंगमे बदलाव कएलक अछि। शुक्र दिन (04 अप्रैल, 2025) के एहि संबंधमे आदेश पत्र जारी करैत समय सारणी केर जानकारी देल गेल अछि।
टाइमिंगमे बदलावक बाद स्कूलक छात्र-छात्राकेँ बेसी रौदमे जाय-आबय नहि पड़त। 12:30 बजे धरि छुट्टी भ’ जायत।
7 अप्रैलसँ एक जून धरि ई समय बदलाव लागू रहत। बदलावक बाद सभ प्राथमिक आ माध्यमिक विद्यालयक संचालन भोर 6:30 बजेसँ अपराह्न 12:30 बजे धरि होयत। 7 अप्रैलसँ ई आदेश प्रभावी होयत। अर्थात् सोमदिनसँ भोरका स्कूल शुरू भऽ जायत, जे कि ०१ जून धरि रहत। एकर बाद गरमीक छुट्टी लागि जायत। शिक्षा विभाग पत्र जारी करैत प्रार्थनासँ ल’ क’ सातम घंटी धरिक समयक निर्धारण क’ देलक अछि।
स्कूल खोलबाक समय भोर 6:30 बजे रखल गेल अछि। 6:30 बजे सँ 7:00 बजे धरि स्कूलक साफ-सफाई भ’ रहल होयत। एहि बीच प्रार्थनाक काज कएल जायत। 7 बजेसँ 7:40 बजे धरि पहिल घंटी होयत। तकर बाद 7:40 सँ 8:20 तक द्वितीय घंटी होयत। मतलब हर क्लास 40 मिनटक होयत। 8:20 सँ 9 बजे धरि तृतीय घंटी चलत। तकर बाद 9 बजे सँ 9:40 तक 40 मिनटक लंच होयत। लंचक बाद 9:40 सँ 10:20 बजे तक चौथी घंटी होयत। 10:20 बजेसँ 11 बजे धरि 5वीं घंटी आ 11 बजेसँ 11:40 धरि छठमी घंटी होयत। 11:40 सँ 12:20 धरि सातमी घंटी होयत। तकर बाद छात्र-छात्रा सभकेँ छुट्टी देल जायत। मुदा शिक्षक सभकेँ 12:30 बजे केर बाद स्कूल छोड़’ पडत। एहि दौरान 10 मिनट धरि प्रधानाध्यापक सभ शिक्षकसँ पढ़ाओल गेल विषयक समीक्षा करतथिन। आगू दिनक लेल काजक योजना आ छात्र सभकेँ देल गेल होमवर्कक समीक्षा सेहो कयल जाएत।
