केन्द्र शासित प्रदेश जम्मू-कश्मीरकेँ एकटा नव मुख्यमंत्री भेटल अछि। उमर अब्दुल्ला जम्मू-कश्मीरक नव मुख्यमंत्री बनल छथि, ओ मुख्यमंत्रीक रूपमे शपथ लेलनि अछि।
उमर अब्दुल्लाक रुपमे १० सालक बाद जम्मू-कश्मीरकेँ नव मुख्यमंत्री भेटल अछि। हुनक शपथग्रहण समारोहमे राहुल गाँधी, प्रियंका गाँधी आ अखिलेश यादव सहित इंडिया ब्लॉकक कतेको दिग्गज लोकनि भाग लेलनि। एकर सङ्गहि जम्मू-कश्मीरक नव अब्दुल्ला मंत्रिमंडलमे विधायक मंत्री लोकनि सेहो शपथ लेलनि। ओना, कांग्रेस पहिनेसँ स्पष्ट कऽ देने छल जे हुनकर कोनो विधायक एखनि मंत्रिमंडलक शपथ नहि लेताह। ई समारोह शेर-ए-कश्मीर अंतर्राष्ट्रीय सम्मेलन केंद्र (एसकेआईसीसी) मे भेल छल। सतीश शर्मा, सकीना इटू, सुरिंदर चौधरी, जावेद राणा आ जावेद डार सेहो मंत्रीक रूपमे शपथ लेलनि।
नेशनल कॉन्फ्रेंस (एनसी) आ कांग्रेस जम्मू-कश्मीर विधानसभा चुनावमे ९० सीटमेसँ ४२ सीट जितलक। ओतहि भाजपा २९ विधानसभा सीट जीतबामे सफल रहल।महबूबा मुफ्तीक पार्टी पीडीपी एहि चुनावमे नीक प्रदर्शन नहिं कऽ सकल।
जम्मू-कश्मीरक नव मुख्यमंत्री बनलाक बाद उमर अब्दुल्ला एकटा पैघ निर्णय लेलनि अछि। ओ सुरिंदर सिंह चौधरीकेँ केन्द्र शासित प्रदेशक नव उपमुख्यमंत्री बनयबाक निर्णय लेलनि। चौधरी भाजपाक जम्मू-कश्मीरक प्रदेश अध्यक्ष रविंदर रैनाकेँ पराजित कयने छथि।
जम्मू-कश्मीरक मुख्यमंत्रीक रूपमे शपथ लेबासँ पहिने उमर अब्दुल्ला कहलनि, “जम्मू-कश्मीर एकटा केन्द्र शासित प्रदेश अछि, जे अपनेमे दुर्भाग्यपूर्ण अछि। मुदा हम सदिखन कहैत रहल छी जे केंद्र शासित प्रदेशक रूपमे हमर स्थिति अस्थायी अछि। हमरा भारत सरकारसँ वादा भेटल अछि जे राज्यक दर्जा बहाल कयल जायत।”
