रक्षामंत्री राजनाथ सिंह कहलनि अछि जे ओ दिन दूर नहिं अछि जखन भारत विश्वक महाशक्ति होयत। बृहस्पतिकेँ मध्य प्रदेशमे एकटा चुनावी जनसभाकेँ सम्बोधित करैत सिंह बुधदिन दिल्लीमे एकटा कार्यक्रममे अमेरिकी राजदूत एरिक गार्सेटीक ओहि बयानक उल्लेख कयलनि जाहिमे ओ कहने छल “जँ अहाँ भविष्य देखय चाहैत छी तँ भारत आउ। जँ अहां भविष्य के अनुभव करय चाहैत छी तऽ भारत आउ। जँ अहाँ भविष्य पर काज करय चाहैत छी तऽ भारत आउ।”
रक्षामंत्री कहलनि जे प्रधानमंत्री नरेन्द्र मोदीक नेतृत्वमे देश विकासक पथ पर तेजीसँ आगू बढ़ि रहल अछि। अगिला २०-२५ सालमे भारत सुपर पावर अर्थात दुनियाक महाशक्ति बनि जायत। दुनिया हमरा सभकेँ आशासँ देखि रहल अछि। दुनियाक पैघ देश सेहो एकरा स्वीकार कऽ रहल अछि।
भाजपा नेता कहलनि जे पीएम मोदीक नेतृत्वमे हमर सरकार समाजक प्रत्येक वर्गक विकासक लेल काज कयलक अछि। किसानक आमदनी बढ़ेबाक आ हुनक मदति करबाक प्रयास कयल गेल अछि। किसान सम्मान निधिक रूपमे हर साल किसानकेँ देल जा रहल ६,००० टाकाक उल्लेख करैत ओ कहलनि कि इ किसानकेँ उर्वरक, बीया आदि खरीदयमे मदद करैत अछि। मुदा विपक्ष एकरो आलोचना करैत अछि।
रक्षामंत्री कहलनि कि हमर सरकार बिना कोनो भेदभावक जनताक विकासक लेल काज कयलक अछि। एहि योजनाक लाभ धर्म, जाति, सम्प्रदायकेँ देखने बिना आम जनताकेँ सोझे देल गेल अछि। ओ कहलनि जे युवासभकेँ रोजगार आ महिलासभकेँ न्याय देबाक लेल कदम उठाओल गेल अछि।
रक्षामंत्री कहलनि जे हमर सरकार महिलासभकेँ आगू बढ़ेबाक आ हुनका सङ्ग भेल अन्यायकेँ समाप्त करबाक प्रयास कऽ रहल अछि। एहि क्रममे तीन तलाकक कुप्रथाकेँ समाप्त कऽ देल गेल। ओ कहलनि जे मोदी सरकार हिन्दू, मुसलमान, सिख, ईसाई सहित सभ धर्म आ समुदायक महिलाकेँ सशक्त बनयबाक लेल प्रतिबद्ध अछि।
