ई कारवाई गुप्त सूचनाक आधार पर कएल गेल। एहि मामिलाक जानकारी एसडीपीओ नगर २ विनीता सिन्हा देलनि अछि। ओ कहलनि जे गिरफ्तार कयल गेल सभ आरोपी पंजाब आ हरियाणाक रहनिहार अछि। कारवाई करबाक लेल एकटा विशेष टीमक गठन कयल गेल छल।
एसडीपीओ २ आगू जनतब देलनि जे शराबक संबंधमे जिलामे लगातार छापा मारल जा रहल अछि। एम्हर एकटा गुप्त सूचना भेटल जे पेट्रोल गैस टैंकमे लगभग १ करोड़ टाकाक विदेशी शराब नुकायल जा रहल अछि। तीनू आरोपी चालक आ सहायक अछि जकरा घटनास्थलसँ गिरफ्तार कयल गेल। पुलिस मामिलाक आगू जांच कए रहल अछि। मुदा, एखन धरि ई पता नहि चलल अछि जे शराब कतय जा रहल छल। पूरा मामीलाक जांच कएल जा रहल अछि।
एम्हर मुजफ्फरपुरक सकरा थाना क्षेत्रक महमदपुर सुस्ता गांव निवासी नितेश कुमार उर्फ अभिनव रायक हत्या मामिलामे पुलिसकेँ बड़का सफलता भेटल अछि। एहि मामिलामे दूटा मुख्य आरोपीकेँ गिरफ्तार कएल गेल अछि। संगहि, पुलिस एहि बारेमे चौंकावयवला खुलासा कयलक अछि।
दरअसल, नितेश दुर्गा पूजाक मेला देखबा लेल बाहर जाइत काल अचानक गायब भऽ गेल छल। घटनाक कतेको दिनक बाद ओकर शव एकटा चौरमे क्षत-विक्षत स्थितिमे भेटल। जखनि पुलिस एहि मामिलामे जाँच कयलक तखन कतेको चौंकावयवला खुलासा भेल। नितेशकेँ ओकर दोस्ते सभ अपहरण कएलक आ ओकर हत्या कय ओकर शरीरकेँ बोरामे राखि चौरमे फेकि देने छल।
