नेपालमे लगातार बरखा होयबाक कारणेँ बिहारक नदीसभ पहिनेसँ उफान पर छल। आब कोसी आ गंडक नदी पर बैराज खुललासँ आधासँ बेसी बिहारक भाग विनाशक स्थितिमे अछि। अधिकारीसभक अनुसार, दुनू नदी अपन तटबन्ध तोड़बाक लेल आतुर छल।
नेपालमे भारी बरखाक कारण भारतक सीमावर्ती राज्य बिहारमे तबाही मचि रहल अछि। नेपालसँ बिहार धरि भारतमे आबयवला गंडक आ कोसी नदी ५०सँ बेसी ठाम तबाही मचा देने अछि। संगहि कतेको आन निचला क्षेत्रमे प्रवेश करबाक लेल तटबन्ध तोड़बाक लेल आतुर छल। बिहारमे वाल्मीकि नगर आ बीरपुर बैराजक द्वार खुजलासँ ई स्थिति उत्पन्न भेल अछि।
जहिना एहि फाटकसँ पानि छोड़ल जाइत अछि, राज्यक आधासँ बेसी भागमे बाढ़िक खतरा आबय लागल अछि। राज्यसँ बहैवला गंडक, कोसी, बागमती, महानन्दा आ अन्य नदीक जलस्तर खतराक निशानकेँ पार कऽ तबाही मचाबय लागल अछि। स्थिति एहेन भऽ गेल अछि जे राज्यक १३ जिलाक १.४१ लाख आबादी पलायन करय लेल विवश अछि। राज्य जल संसाधन विभागक प्रधान सचिव संतोष कुमार मल्लक अनुसार शनिदिन दुपहरमे कोसी नदी पर बीरपुर बैराज खोललाक बाद कुल ५.३१ लाख क्यूसेक पानि छोड़ल गेल।
५६ साल बाद कोसीक एहेन रौद्ररुप :
कोसी नदीमे एक बेर एतेक पानि पछिला ५६ सालमे पहिल बेर छोड़ल गेल अछि। ओ कहलनि जे एक बेरमे एतेक मात्रामे पानि अबैत तटबन्धकेँ खतरा उत्पन्न भऽ गेल अछि। स्थिति केर देखैत तटबंधक सुरक्षाक लेल आवश्यक व्यवस्था कयल जा रहल अछि। प्रधान सचिवक अनुसार, वर्ष १९६८ मे एहि बैराजसँ एतेक पानि आयल छल। ओहि समय बैराजसँ ७.८८ लाख क्यूसेक पानि छोड़ल गेल छल, जखन कि गंडक नदी पर बनल वाल्मीकि नगर बैराजसँ ४.४९ लाख क्यूसेक पानि छोड़ल गेल छल। पिछला बेर २००३ मे एहि बैराजसँ ई पानि ६.३९ लाख क्यूसेक छोड़ल गेल छल।
जल संसाधन विभागक अधिकारीक अनुसार बिहार आ नेपालमे तीन दिनसँ लगातार बरखा भऽ रहल अछि। एहि कारणेँ गंडक, कोसी, बागमती, बूढ़ी गंडक, कमला बालन आ महानन्दाक सङ्ग गंगाक जलस्तर तेजीसँ बढ़ि रहल अछि। नेपालमे तबाही मचाबय केर बाद गंडक आ कोसी नदी भारतमे सेहो तांडव शुरू कऽ देलक अछि। पश्चिम चंपारणक जोगापट्टी, नौतन, गौनाहा, बगहा-१, बगहा-२, रामनगर, मझौलिया आ नरकटियागंज प्रखंडक अतिरिक्त पूर्वी चम्पारणक कतेको क्षेत्रमे बाढ़ि आबि गेल अछि। एहि क्षेत्रमे रहनिहार लोकसभ अपन घर छोड़ि पलायन कऽ गेल छथि।
वर्तमानमे पूर्वी चम्पारण, पश्चिम चम्पारण, अररिया, किशनगंज, गोपालगंज, शिवहर, सीतामढ़ी, सुपौल, सीवान, मधेपुरा, मुजफ्फरपुर, पूर्णिया आ मधुबनीमे बाढ़िसँ राज्यक १३ जिला बुरी तरह प्रभावित अछि। एहि जिलासभमे २० प्रखण्डक १४० ग्राम पञ्चायतमे रहयवला १.४१ लाख लोक पलायन करबाक लेल विवश भेल अछि। बक्सर, भोजपुर, सारण, पटना, समस्तीपुर, बेगूसराय, मुंगेर आ भागलपुर समेत गंगाक तटवर्ती क्षेत्र पहिनेसँ बाढ़िक चपेटमे छल।
