संसदक बजट सत्र आइसँ शुरू होयत आ सरकारी काजक आवश्यकताक अधीन सत्र १२ अगस्तकेँ समाप्त होयबाक संभावना अछि। एहिसँ पहिने प्रधानमंत्री नरेन्द्र मोदी मीडियासँ बातचीत करैत विकास भारत यात्राक नव लक्ष्यपर चर्चा कयलनि। ओ कहलखिन जे समय आबि गेल अछि जे जमीनी स्तर पर गारंटी देल जाए।
केन्द्रीय वित्त मंत्री निर्मला सीतारमण केन्द्रीय बजटसँ एक दिन पहिने आइ संसदमे सांख्यिकीय पूरकक सङ्ग आर्थिक सर्वेक्षण २०२३-२४ प्रस्तुत करतीह।
प्रधानमंत्री नरेन्द्र मोदी कहलनि, “हम देशक सभ सांसदसभसँ आग्रह करय चाहैत छी जे जनवरीसँ एखनि धरि हमरासभ जतेक संघर्ष करबाक चाही से कयलौंह मुदा आब ओ चरण खतम भऽ गेल अछि, जनता अपन फैसला देलक अछि। हम सभ दलसँ आह्वान करय चाहब जे ओ पार्टी लाइन अर्थात दलीय रेखासँ ऊपर उठि कऽ देशक लेल समर्पित होथि आ अगिला साढ़े चारि साल धरि संसदक एहि गरिमापूर्ण मंचक उपयोग करथि। जनवरी २०२९क चुनाव वर्षमे अहाँ कोनो खेल खेलि सकैत छी, मुदा ताबत धरि हमरासभकेँ किसान, युवा आ देशक सशक्तिकरणक लेल भाग लेबाक चाही।”
पीएम कहलनि, “अहाँसभ देखलहुं जे संसदक पहिल सत्रमे सरकारक आवाज केर दबाबय केर कोशिश कयल गेल जे देशक १४० करोड़ जनता द्वारा बहुमतसँ चुनल गेल अछि। अढ़ाई घंटा धरि प्रधानमंत्रीक आवाज दबाबय केर प्रयास कयल गेल। देशक जनता हमरा सभकेँ पार्टीक लेल नहिं अपितु देशक लेल पठौलक अछि।”
ओ कहलनि, “ई प्रत्येक नागरिकक लेल बहुत गर्वक बात अछि जे भारत पैघ अर्थव्यवस्थामे सबसँ तेजीसँ बढ़ैत अर्थव्यवस्था अछि। पिछला ३ सालमे हम ८ प्रतिशतक निरंतर वृद्धिक संग आगू बढ़ि रहल छी।”
प्रधानमंत्री मोदी एहि ऐतिहासिक उपलब्धि पर कहलनि, “ई गर्वक बात अछि जे ६० सालक बाद कोनो सरकार तेसर बेर सत्तामे आयल अछि आ तेसर बेर पहिल बजट प्रस्तुत करत। हम गारंटी दए रहल छी जे लोककेँ जे आब आर जमीन पर उतारय केर अछि। ई बजट अमृत काल लेल एकटा महत्वपूर्ण बजट अछि। आजुक बजट हमर कार्यकालक अगिला ५ सालमे विकसित भारतक यात्राक दिशा निर्धारित करत।”
प्रधानमंत्री साओनक पहिल सोमक देशवासीकेँ बधाई सेहो देलखिन आ अमृत काल बजट पर अपन विचार साझा कयलनि।
ओ कहलनि, “आइ श्रावण मासक पहिल सोमवार अछि। एहि शुभ दिन पर एकटा महत्वपूर्ण सत्र शुरू भऽ रहल अछि। श्रावणक पहिल सोमवारक हम देशवासीकेँ अपन शुभकामना दैत छी। संसदक मानसून सत्र आइसँ शुरू भऽ रहल अछि। आइ पूरा देश सोचि रहल अछि जे ई सकारात्मक सत्र होयबाक चाही।”
ई सत्र एहन समयमे शुरू होयत जखन एनडीए सरकारकेँ प्रमुख सहयोगी दलक दिसिसँ विशेष राज्यक दर्जाक माँगक सामना करय पड़ि रहल अछि। विपक्ष नीट-यूजी, उत्तर प्रदेशमे कांवड़ यात्राक दौरान भोजनालयपर नामपत्रक विवाद आदि कतेको मुद्दा पर विरोध कऽ रहल अछि।
