रेल मंत्रालय भारतीय रेलवेक टिकट बुकिंग नियममे पैघ बदलाव कयलक अछि। रेलवे एकटा आधिकारिक आदेशमे कहलक अछि जे १ नवम्बर २०२४ सँ टिकटक अग्रिम आरक्षणक समय सीमा १२० दिनसँ घटाकऽ ६० दिन कऽ देल गेल अछि। एहिमे यात्राक तिथि शामिल नहिं अछि।
रेलवे अपन आदेशमे स्पष्ट कयलक अछि जे विदेशी पर्यटकक लेल ३६५ दिनक सीमामे कोनो परिवर्तन नहिं कयल जायत।
टिकटक अग्रिम आरक्षण अवधिमे कटौतीसँ ३१ अक्टूबर २०२४ सँ पहिने कयल गेल बुकिंगपर कोनो असर नहिं पड़त। आदेशमे कहल गेल अछि, “३१ अक्टूबर तक १२० दिनक अग्रिम आरक्षण अवधि (एआरपी) केर तहत सबटा बुकिंग अपरिवर्तित रहत। नव नियम मात्र १ नवम्बरसँ बनल बुकिंग पर लागू होयत।”
रेलवे कहलक जे अग्रिम आरक्षणक समय सीमामे कटौतीक बादो ६० दिनक एआरपीसँ आगू बुकिंग रद्द करबाक अनुमति देल जायत।
मंत्रालय इहो स्पष्ट कयलक जे ताज एक्सप्रेस आ गोमती एक्सप्रेस सन किछु दिनक एक्सप्रेस ट्रेनक लेल अग्रिम आरक्षणक समयमे कोनो परिवर्तन नहि कयल जायत।
यात्रीसभसँ कतेको शिकायत भेटलाक बाद रेलवे १४ जून, २०१८ केँ ई-टिकटिंग प्रणाली शुरू कयलक जाहिसँ ट्रेनमे लॉगिन कयने बिना ट्रेनक जानकारी देल जा सकय। एकर अतिरिक्त सीटक उपलब्धता सेहो सुनिश्चित कयल जा सकैत अछि।
टिकट प्रणालीमे ‘माई ट्रांजेक्शन’ नामक एकटा नव सुविधा सेहो अछि जतय उपयोगकर्ता यात्राक तिथि, बुकिंग तिथि, आगामी यात्रा आ पूरा यात्राक आधार पर टिकट बुक देख सकैत छथि।
नव यूजर इंटरफेस मोबाइल, डेस्कटॉप, लैपटॉप आ टैबलेटमे टिकट बुकिंग केर आसान सुविधा प्रदान कयलक अछि।
भारतीय रेलवे दुनियाक चारिम सभसँ पैघ रेलवे नेटवर्क अछि, जकर लम्बाई ६७,००० किलोमीटरसँ बेसी अछि। प्रतिदिन २.४ करोड़ यात्री ट्रेनमे यात्रा करैत छथि।
