जन सूराजक संस्थापक प्रशांत किशोर मंगलदिन (12 अगस्त 2025) बक्सर पहुंचलाह। एहि ठाम ओ दावा कयलनि जे एहि साल नवंबर धरि बिहारमे नीतीश कुमारक सत्तासँ हटब निश्चित अछि। एहि दौरान मीडियाक एकटा सवालक जवाबमे पीके कहलनि जे हमर बेटा बिहारमे नहि, देशक सबसँ नीक स्कूलमे पढ़ैत अछि, मुदा हम बिहारकेँ बेहतर बनेबा लेल संघर्षरत छी। हम एतय बोरावला गवर्नमेंट स्कूलसँ सेहो पढ़ने छी। हम अपनहि आगू बढ़ल छी। ककरो लूटि कय नहि।
प्रशांत किशोर कहलनि जे हुनकर बदलाव यात्रा पूरा बिहारमे चलि रहल अछि। आइ ई यात्रा डुमरांव सेहो पहुँचि गेल अछि। हुनक दावा छल कि जाति, धर्म आ पार्टीक सीमासँ ऊपर उठी कय बिहार केर हर वर्ग परिवर्तन चाहैत अछि। लालू आ नीतीशसँ मुक्ति भेटब आब जनताक प्राथमिकता अछि।
भाजपा आ सत्ताधारी पार्टी पर हमला करैत प्रशांत किशोर आरोप लगौलनि जे एसआईआरक माध्यमसँ गरीब आ प्रवासी बिहारी मतदाताक नाम मतदाता सूचीसँ हटाबय केर साजिश चलि रहल अछि। सरकारकेँ पता अछि गरीब जनता शराबबंदी आ भ्रष्टाचारसँ नाराज अछि आ ओकर खिलाफ वोट करत। ताहि लेल हुनका लोकनिक नाम हटाओल जा रहल अछि।
प्रशांत किशोर चुनाव आयोगक निष्पक्षता पर सेहो सवाल उठेलनि। ओ कहलनि जे, कतबो नाम हटाओल जाय, मुदा जे मतदाता रहत ओ भाजपा आ नीतीश सरकारकेँ हटाबय लेल काफी अछि। प्रशांत किशोर केर ई बयान बिहारक राजनीतिमे हलचलक रूपमे मानल जा रहल अछि, कारण ओ लगातार राज्यमे बदलाव आ नव राजनीतिक बात कय रहल छथि। एहि तरहक बयानक कतेक असरि पड़ैत अछि से चुनावक बाद देखय लेल भेटत।
