प्रधानमंत्री नरेन्द्र मोदी मंगलदिन एनडीए सांसदक सङ्ग बैसार कयलनि। एहि बैसारमे प्रधानमंत्री एनडीए सांसदसभसँ संसदीय नियम आ संसदीय आचरणक पालन करबाक अपील कयलनि। प्रधानमंत्री कहलनि, “विपक्ष कोनो गैर-कांग्रेसी नेताकेँ लगातार तेसर बेर प्रधानमंत्री बनब बर्दाश्त करबामे असमर्थ अछि।
एनडीए सांसदक बैसारकेँ सम्बोधित करैत मोदी कहलनि जे विपक्ष एहि बातसँ परेशान अछि जे पहिल बेर कोनो गैर-कांग्रेसी नेता, ओ सेहो ‘चायवाला’, लगातार तेसर बेर प्रधानमंत्री बनल अछि। नेहरू-गाँधी परिवार पर कटाक्ष करैत मोदी कहलनि जे “कांग्रेसक सदस्य प्रधानमन्त्री होइत छलाह आ अपन दायरासँ बाहरक लोकसभकेँ बहुत कम मान्यता दैत छलाह। कांग्रेसक सबसँ प्रमुख परिवारसँ बाहरक प्रधानमन्त्रीसभक योगदानकेँ अनदेखा कयल गेल, ओ सुनिश्चित कयलनि जे प्रधानमंत्रीक रूपमे ओ सभकेँ मान्यता भेटय, किएक तऽ सभ कोनो ने कोनो रुपमे देशक लेल योगदान देलक अछि।”
एनडीए सांसदक बैसारकेँ सम्बोधित करैत प्रधानमंत्री मोदी एनडीए सांसदसभसँ आग्रह कयलनि जे ओ वरिष्ठ सदस्यसभसँ संसदमे सर्वोत्तम प्रथाक विषयमे सीखथि। सोमदिन लोकसभामे राहुल गाँधीक भाषणक बाद प्रधानमंत्री मोदीक अपील आयल, जकरा एनडीए सबसँ गैर जिम्मेदाराना भाषण कहलक। बैसारक बाद संवाददाता सभकेँ जानकारी दैत संसदीय कार्य मंत्री किरेन रिजिजू कहलनि जे मोदी सांसदसभसँ संसदक मुद्दाक अध्ययन करबाक, संसदमे नियमित रूपसँ उपस्थित रहबाक आ अपन निर्वाचन क्षेत्रसँ जुड़ल मुद्दा प्रभावी रूपसँ उठयबाक लेल कहलनि।
जखन किरेन रिजिजूसँ पूछल गेल जे की प्रधानमंत्री मोदी सोमदिन लोकसभामे देल गेल राहुल गाँधीक भाषणक उल्लेख कयलनि ? ताहि पर रिजिजू कहलनि, “ओ एहन किछु नहिं कहलनि, मुदा जखन देशक प्रधानमंत्री बजैत छथि तखन संदेश सबके लेल होइत अछि।”
उल्लेखनीय अछि जे राहुल गाँधी सोमदिन लोकसभामे भाजपापर जोरदार हमला कयने छल, जाहिमे सत्तारूढ़ दलक नेतासभ पर लोकसभकेँ साम्प्रदायिक आधार पर विभाजित करबाक आरोप लगाओल गेल छल। सत्तारूढ़ दल एकर कड़ा विरोध कयलक, प्रधानमंत्री मोदी पूरा हिन्दू समुदायकेँ हिंसक कहबाक लेल कांग्रेस नेतापर हमला कयलनि।
रिजिजू कहलनि जे गठबंधनक बैसारमे राजगक नेता लोकनि मोदीकेँ हुनक “ऐतिहासिक” तेसर कार्यकालक लेल बधाई देलनि। प्रधानमंत्री सांसदसभसँ मीडियाक समक्ष टिप्पणी करबासँ पहिने कोनो मुद्दाक अध्ययन करबाक लेल कहलनि आ कहलनि जे हुनका अपन निर्वाचन क्षेत्रक सम्पर्कमे रहबाक चाही आ मतदाताकेँ समर्थनक लेल धन्यवाद देबाक चाही।
