वरिष्ठ नेता आ भारतीय कम्युनिस्ट पार्टी (मार्क्सवादी)क महासचिव सीताराम येचुरीक बृहस्पतिकेँ निधन भऽ गेलनि। ७२ वर्षक आयुमे ओ अन्तिम सांस लेलनि। ओ बहुत दिनसँ बीमार चलि रहल छलथि। हालहिमे हुनका एम्समे भर्ती कएल गेल छल।
७२ वर्षीय माकपा नेताकेँ पहिने १९ अगस्तकेँ एम्समे भर्ती कयल गेल छल। बादमे हुनका आईसीयूमे स्थानांतरित कए देल गेल। तखनिसँ हुनकर इलाज चलि रहल छल।
बृहस्पति दिन हुनकर स्वास्थ्य एक बेर फेर बिगड़ि गेल आ नहिं बचि सकलाह।
सीताराम येचुरी भारतीय कम्युनिस्ट पार्टी (मार्क्सवादी)क महासचिव आ पार्टीक संसदीय समूहक नेता छलथि। हुनकर जन्म १२ अगस्त १९५२केँ चेन्नईमे एकटा तेलुगु भाषी ब्राह्मण परिवारमे भेल छल। हुनका २०१६ मे राज्यसभामे सर्वश्रेष्ठ सांसद पुरस्कारसँ सम्मानित कयल गेल छल। आपातकालक समय जेएनयूमे रहैत हुनका गिरफ्तार कयल गेल छल। एकर बाद ओ लगातार तीन बेर जेएनयू छात्र संघक अध्यक्ष चुनल गेलाह। १९८४मे हुनका माकपाक केन्द्रीय समितिमे शामिल कयल गेल। २०१५ मे ओ पार्टीक महासचिव चुनल गेलाह।
येचुरी २००५मे पश्चिम बङ्गालसँ राज्यसभाक लेल चुनल गेलाह। ओ सदनमे कतेको मुद्दा उठौलनि। पिछला कतेको दिनसँ हुनकर स्वास्थ्य बिगड़ि रहल छल। येचुरीक हालहिमे मोतियाबिंदक सर्जरी भेल छल। फेफड़ाक संक्रमणक कारण आब हुनका एम्समे भर्ती कयल गेल छल। हालहिमे ओ कोलकाताक घटनाक विषयमे बयान देने छलथि। संगहि, नव आपराधिक कानूनक संबंधमे दायर याचिकामे विपक्षी गठबन्धन इंडियाक समर्थन कयने छलथि। वामपंथी नेताक रूपमे हुनक एकटा अलग पहिचान छल। ओ सदैव वामपंथी विचारधाराक विषयमे आवाज उठबैत छलथि।
