रक्षामंत्री राजनाथ सिंह बृहस्पति दिन भारतीय जनता पार्टीक उम्मीदवार राजीव प्रताप रूडीक समर्थनमे सारणमे एकटा रैलीकेँ सम्बोधित कयलनि। एतय ओ कांग्रेस आ राष्ट्रीय जनता दल (राजद) पर हमला कयलथि। सङ्गहि ओ जवाहरलाल नेहरू, इन्दिरा गाँधी, राजीव गाँधी आ मनमोहन सिंहकेँ सेहो निशाना बनओलनि जे कांग्रेसक युगमे प्रधानमन्त्री छलाह।
राजनाथ सिंह कहलनि, ‘अहाँ लोकनि हमरा बहुत गर्मजोशीसँ स्वागत कयलहुं। अहाँसभ राजीव प्रताप रूडीक समर्थन करू। हम अहाँसभसँ इ अपील करए लेल अईठाम आयल छी। ओ संसदमे सारणक आवाज उठबैत छथि। हम आशा करैत छी जे रूडीकेँ एहि चुनावमे अहाँक आशीर्वाद भेटत।” राजनाथ सिंह एक बेर फेर प्रधानमंत्री नरेन्द्र मोदीक ४०० पारक नाराकेँ एतय दोहरओलनि। ओ कहलनि “देशक माहौल भाजपाक पक्षमे अछि। एनडीए ४०० केर पारक लक्ष्य हासिल करत।
राजनाथ सिंह जनसभामे कहलनि जे जखन प्रधानमंत्री मोदी अंतर्राष्ट्रीय मंच पर बजैत छथि तखन दुनिया खुजल कानसँ सुनैत अछि। भारत विदेशमे डंका बाजि रहल अछि। अर्थव्यवस्थामे सुधार भेल अछि। ई 5म स्थान पर अछि। वर्ष २०२७ मे भारत धनक मामिलामे शीर्ष ३ देशमे आबि सकैत अछि। भारतमे कतहु आतंकवाद नहिं अछि। भारत दुनियाक एकटा शक्तिशाली देश बनि गेल अछि। भारत सीमा पार जा सेहो हमला करैत अछि।
एकर बाद ओ नेहरू, इन्दिरा, राजीव गाँधी, मनमोहन सिंह पर हमला कयलनि जे कांग्रेस सरकारमे प्रधानमन्त्री छलाह। “नेहरू, इन्दिरा, राजीव गाँधी, मनमोहन सिंह सभगोटे कहलनि जे भ्रष्टाचार गरीबी समाप्त कऽ देब, मुदा हुनक सभक शासनकालमे व्यापक भ्रष्टाचार, गरीबी छल। मुदा पीएम मोदीक शासनकालमे कोनो भ्रष्टाचार नहिं भेल अछि। गरीबक लेल बहुत रास योजना शुरू कयल गेल अछि। हुनकर जीवनमे बदलाव आयल अछि।”
राजनाथ सिंह आगू कहलनि जे दिल्ली सँ १०० पैसा चलैत अछि तखन सभ १०० मे सँ १०० पैसा अहाँक जेब धरि पहुँचि जाइत अछि।
रक्षा मंत्री ओहि घटनाक सेहो उल्लेख कयलनि जखन रूस-यूक्रेन युद्धक दौरान भारतीय छात्रसभकेँ निकालल गेल छल। ओ कहलनि, ‘जखन हमर देशक कतेको बच्चा यूक्रेनमे पढ़ि रहल छल आ रूसक संग युद्ध भेल छल, पुतिन आ यूक्रेनक राष्ट्रपतिक चर्चा भेल आ चारि घंटा धरि युद्ध रोकि देल गेल। भारतीय बच्चाकेँ सुरक्षित बाहर निकालल गेल। एकरा संग राजनाथ अपील कयलनि जे लालटेनक युग नहिं आबय केर चाही। संगहि ओ राजद पर हमला करैत कहलनि जे ओ सब बिहारक संग खेलि चुकल छथि। रैलीमे आयल लोक सभकेँ चारा घोटालाक सेहो याद दियौलनि।
तखन ओ बिना नाम लेने, विरासत करक मुद्दा पर सैम पित्रोदाक बयानक उल्लेख कयलनि। “कांग्रेसक एकटा नेता कहैत छथि जे जखन अमेरिकामे ककरो मृत्यु भऽ जाइत अछि तखन ओकर आधा धन सरकार छीन लैत अछि। ओ कहि रहल छथि जे एहन कानून भारतमे आबय केर चाही। हम अहाँ सभसँ पूछए चाहैत छी। की एहन कानूनक जरूरत अछि ? कांग्रेस वाला किछो बयान दऽ रहल छथि। राजनाथ आगू कहलनि कि आयुष्मान भारत योजनाक तहत ५ लाख तकक मुफ्त इलाज भऽ रहल अछि।