राष्ट्रीय जनता दल (राजद) नेता आ पूर्व उपमुख्यमंत्री तेजस्वी यादव १५ अगस्तक बाद बिहार दौरापर निकलबाक घोषणा कयलनि अछि। मानल जाइत अछि जे तेजस्वी अपन ‘बिहार यात्रा’क माध्यमसँ मुख्यमंत्री नीतीश कुमारकेँ घेरबाक योजना बनौने छथि, जाहिमे बिहारमे बढ़ैत भ्रष्टाचार, अपराध, जाति आ साम्प्रदायिकता सम्मिलित अछि।
बिहारमे अगिला साल विधानसभा चुनाव हेबाक अछि, मुदा राजनीतिक शतरंज पहिनेसँ बिछाओल जा रहल अछि। राजद नेता तेजस्वी यादव नीतीश कुमारकेँ सत्तासँ हटाबय लेल राज्यक दौरा शुरू करय जा रहल छथि। नीतीश राजदसँ सत्ता छीनबा लेल जे राजनीतिक हथियार इस्तेमाल कयलथि, आब तेजस्वी फोर-सी योजना बना कए बिहारमे सत्तामे आबय केर खाका तैयार कयलनि अछि। जेडीयू-भाजपा गठबंधनक विरुद्ध तेजस्वी यादव क्राइम, करप्शन, कास्ट आ कम्युनलिज्मक मुद्दा पर राजनीतिक शतरंज बिछाबय केर रणनीति बनौने छथि।
राष्ट्रीय जनता दल (राजद) नेता आ पूर्व उपमुख्यमंत्री तेजस्वी यादव १५ अगस्तक बाद बिहार दौरापर निकलबाक घोषणा कयलनि अछि। मानल जाइत अछि जे तेजस्वी अपन ‘बिहार यात्रा’क माध्यमसँ विभिन्न मुद्दा पर नीतीश कुमारकेँ घेरबाक योजना बनौने छथि, जाहिमे ओ बिहारमे जाति आधारित जनगणना आ राज्यमे बढ़ैत अपराध रखलनि अछि। एकर अलावा नीतीश कुमारकेँ भ्रष्टाचारक मुद्दाक संग साम्प्रदायिकताक कठघरामे रखबाक रणनीति अछि। मुख्यमंत्री नीतीश कुमार अक्सर कहैत रहल छथि जे अपराध, भ्रष्टाचार आ साम्प्रदायिकतासँ कोनो समझौता नहिं होयत, मुदा आब एही मुद्दाकेँ नीतीश कुमार पर एकटा आश्चर्यजनक राजनीतिक हथियारक रूपमे आजमायल जायत। एहेनमे देखबाक अछि जे बिहारक लेल शुरू भेल शाह-मातक खेलमे के भारी होएत।
बिहारमे तेजस्वी यादव २०२५ केर चुनाव जातिगत शतरंजपर जीतबाक योजनाक रूपरेखा तैयार कयलनि अछि। नीतीश कुमारकेँ घेरबाक एकटा पैघ मुद्दा तेजस्वीक हाथमे आबि गेल अछि। नीतीश जखन तेजस्वी उपमुख्यमंत्री छलाह तखन बिहारमे जाति सर्वेक्षण कऽ आरक्षणक दायरा बढ़ेबाक काज कयने छलाह। जातिक आधार पर आरक्षणक कुल सीमा ५० सँ बढ़ाकऽ ६५ प्रतिशत कऽ देल गेल छल, मुदा उच्च न्यायालय एकरा पर रोक लगा देलक। एकर बाद नीतीश सरकार सुप्रीम कोर्ट चलि गेल अछि, जतय सुनवाई हेबाक अछि।
राजद आ तेजस्वी यादव एहि मुद्दा पर नीतीश सरकारकेँ घेरबाक योजना बनौने छथि। राजद लगातार इ कहि रहल अछि जे नीतीश कुमार भाजपाक संग सरकार बनौने छथि। एहि तरहेँ डबल इंजन सरकार अछि आ जँ नवम अनुसूचीक लेल दबाव होइत तँ ई स्थिति उत्पन्न नहिं होइत । एहेनमे तेजस्वी यादव एहि लेल नीतीश कुमारकेँ जिम्मेदार ठहराबय केर रणनीति बनौने छथि। एहि बहाने दलित आ ओबीसी जातिकेँ अपन संग लामबंद करबाक रणनीति अछि।
अपन बिहार यात्राक क्रममे तेजस्वी यादव राज्यक बिगड़ैत कानून-व्यवस्थाकेँ राजनीतिक मुद्दा बनयबाक योजना बनौने छथि। ओ पछिला किछु दिनसँ बिहारमे भेल अपराधक घटना आ आँकड़ाक बुलेटिन जारी कऽ एकर संकेत देलनि अछि। तेजस्वी नीतीश सरकारकेँ कठघरामे रखबाक लेल सोशल मीडिया पर लगातार अपराध बुलेटिन जारी कऽ रहल छथि।
तेजस्वी बिहारमे भेल ५५ अपराधक सूची जारी कयने छलाह। एकर अलावा लूट, हत्या आ डकैतीक घटनाक जिक्र करैत ई बताबय केर कोशिश कएल जा रहल अछि जे नीतीश कुमारक सरकारमे बिहारक कानून व्यवस्था कोना कमजोर अछि आ लोकक जीवन आ संपत्तिक रक्षा कोना नहिं भऽ रहल अछि। नीतीश कुमार बिहारमे सत्तामे आबय लेल कानून व्यवस्थाकेँ राजनीतिक हथियार सेहो बना देने छलाह आ ओहिना तेजस्वी हुनका हराबय लेल ताना-बाना बुनि रहल छथि।
जेडीयू मुख्यमंत्री नीतीश कुमारक छविकेँ सबसँ पैघ ताकत बतबैत रहल अछि, जकरा राजद दाग देबाक योजना बनौने अछि। तेजस्वी अपन बिहार यात्रामे राज्यमे भ्रष्टाचारकेँ मुद्दा बनयबाक रणनीति बनौने छथि। तेजस्वी यादव हालहिमे कहलनि जे नीतीश कुमारक शासनकालमे सृजन घोटालासँ लऽ कऽ ५० सँ बेसी घोटालाक सूची अछि। हालहिमे कतेको आन घोटालाक पर्दाफाश भेल अछि।
बिहारमे पुलक ढ़हब, प्रशासनिक अधिकारी संजीव हंसक ईडी केर चपेटमे आबयसँ राजनीतिक शतरंज बिछाबय लागल अछि, हुनकर रणनीति इ अछि जे बिहार सरकार भ्रष्टाचार आ घोटाला पर अंकुश लगाबयमे विफल रहल अछि।
एहि तरहेँ तेजस्वी यादव २०२५ केर विधानसभा चुनावमे भ्रष्टाचारकेँ मुद्दा बनयबाक लेल प्रयोग शुरू कऽ देने छथि।
तेजस्वी यादवक रणनीति मुख्यमंत्री नीतीश कुमारकेँ साम्प्रदायिक घोषित करबाक सेहो अछि। एकरा लेल ओ एकटा योजना बनौने छथि जे मुख्यमंत्री नीतीश कुमार भाजपा आ मोदी सरकारक संग कोना ठाढ़ छथि। २०२४ केर चुनावमे मोदी सरकार बनेबामे नीतीश कुमार सबसँ पैघ भूमिका निभौलनि अछि, जँ नीतीश कुमार इंडिया गठबंधनसँ अलग नहिं होइत तऽ आइ केंद्रमे मोदी सरकार नहिं बनैत। नीतीश कुमार भाजपाक संग सांठगांठ कऽ बिहारमे धर्मनिरपेक्षताकेँ कमजोर कऽ देने छथि।
मुदा, ई मुद्दा तेजस्वी लोकसभा चुनावक दौरान सेहो उठौलनि। जबाबमे नीतीश कुमारकेँ अपन बैसारमे स्पष्ट करय पड़ल जे भाजपाक संग रहि कऽ सेहो ओ अल्पसंख्यकसभकेँ कोनो नोकसान नहिं होबय देलनि। तेजस्वी यादव आ राजद लग नीतीशक भाजपाक संग गठबंधन साम्प्रदायिक बताबय केर रणनीति अछि।
