बिहारक मुख्यमंत्री नीतीश कुमार राज्यक दौरा पर निकलि गेल छथि। एकरा लेल जेडीयू नारा देलक अछि, ‘ जब बात बिहार की हो, नाम मात्र नीतीश कुमार का हो।’
बिहारमे चुनावमे लगभग १० महीना बचल अछि, मुदा मुख्यमंत्री नीतीश कुमारक पोस्टर बिहारक राजनीतिक तापमानकेँ एतेक बढ़ा देलक अछि। लगैत अछि जे एकर लौ भाजपा आलाकमान धरि पहुँचि रहल अछि। ‘बिहार में बहार है, नीतीशे कुमार है’ केर बाद जेडीयू नारा देलक अछि, ‘जब बात बिहार की हो, नाम सिर्फ नीतीश कुमार का हो।’ एहि नाराक बाद कहल जा रहल अछि जे नीतीश कुमार एहि पोस्टरक माध्यमसँ भाजपा आलाकमानक सामने अपन मंशा व्यक्त कयलनि अछि।
दरअसल, नीतीश कुमार प्रगति यात्रा पर छथि आ ओ एहि यात्राक शुरुआत ओही चंपारणसँ कयलनि अछि, जतयसँ महात्मा गांधी अपन पहिल सत्याग्रह कयलथि। एतयसँ प्रशांत किशोर सेहो जनसुराजक यात्रा प्रारम्भ कयलनि।
आब जखनि जेडीयू केर मुख्यमंत्री अछि तखनि ई नारा जेडीयू लेल उपयुक्त अछि, मुदा की जेडीयूक सहयोगी भाजपा एहि नारासँ समान रूपसँ सहमत होयत ? किएकि आब चुनावक समय अछि। एहि चुनावमे जेडीयू आ भाजपा मात्र एक दोसरक सहयोगी नहि अछि, बल्कि एक दोसरक पूरक सेहो अछि। एक-दोसरक बिना केकरो लेल नीक नहि भए सकैत अछि।
एहेनमे प्रगति यात्रा पर गेल नीतीश कुमारक लेल जे पोस्टर जारी कयल गेल अछि, ओकरा भाजपाक लेल नीतीश कुमारक संकेत मानल जाए जे नीतीश कुमार महाराष्ट्रक एकनाथ शिंदे नहि छथि जे चुनावसँ पहिने जरूरत पड़ला पर विधायक आनि मुख्यमंत्री बनलाह आ चुनावक बाद मुख्यमंत्रीसँ उप मुख्यमंत्री बनलाह।
किएकि इ बात बिहारमे सेहो होबयवाला अछि। एहिसँ पहिने सेहो जखन २०२०क चुनावमे भाजपाकेँ जेडीयूसँ बेसी सीट भेटल छल, तखन वैह बात उठल छल जे जखनि भाजपाक लग बेसी संख्या अछि तखनि मुख्यमंत्री भाजपासँ होयबाक चाही। ओना तखनि ई मामिला मात्र बिहार भाजपा नेता लोकनि उठौलनि आ आलाकमानक हस्तक्षेपक बाद एकरा रोकि देल गेल।
