एहि साल बिहारमे विधानसभा चुनाव होबय जा रहल अछि। राजधानी पटनामे राजनीतिक पोस्टर अभियान शुरू भऽ गेल अछि। जेडीयू कार्यालयक बाहर मुख्यमंत्री नीतीश कुमारक बेटा निशांत कुमारक लेल पोस्टर लगाओल गेल अछि।
बिहार विधानसभा चुनावसँ पहिने निशांत कुमारक राजनीतिमे प्रवेशकेँ लऽ कऽ चर्चा गरम भऽ रहल अछि। दू दिन पहिने निशांत कुमार तेजस्वी यादवक अपन पिताक स्वास्थ्यक विषयमे देल गेल टिप्पणीक जवाब देलनि। आब पटनामे जेडीयू कार्यालयक बाहर निशांत कुमारक नामक पोस्टर लगाओल गेल अछि। पार्टी कार्यकर्ता नीतीशक बेटाकेँ सक्षम बतौलनि अछि। पार्टी कार्यालयक बाहर पोस्टर पर लिखल छल, ‘बिहार करे पुकार, आइए निशांत कुमार।’ जेडीयू पार्टीक कार्यकर्ता निशांत कुमारसँ एहि पोस्टरक माध्यमसँ राजनीतिमे प्रवेश करबाक आग्रह कयलनि अछि। जेडीयू सेहो एकरा कार्यकर्ता सभक भावना बतौलक अछि आ कहलक अछि जे नीतीश कुमारक बेटा सक्षम छथि।
दोसर दिसि राजद नेता तेजस्वी यादव बिहारक मुख्यमंत्री नीतीश कुमारक बेटा निशांत कुमारक बयान पर जवाब दैत कहलनि, ‘हमर पिता हुनका (नीतीश कुमार) सँ स्वस्थ छथि। लालू प्रसाद यादव सामाजिक न्याय कयलनि आ बिहार लेल केंद्रसँ 1 लाख 65 हजार करोड़क पैकेज हासिल कयलथि। लालू प्रसाद यादव जे कयलनि (बिहारक लेल) ओ आउर कियो नहि कयलक।
तेजस्वी कहलनि कि निशांत कुमारकेँ आब सावधान रहबाक चाही। ओ आगू कहलनि, ‘निशांत कुमार हमर भाई छथि आ हुनका आब सावधान रहबाक चाही। मुदा निशांत कुमारकेँ ई सोचबाक जरूरत अछि जे सम्राट चौधरी, विजय सिन्हा, चिराग पासवान, जीतन राम मांझी आ पीएम मोदी जेहेन लोक जे नीतीश कुमारक संग छथि, कहैत छलाह जे हुनकर (नीतीश कुमारक) मानसिक संतुलन ठीक नहि अछि।
