सुप्रसिद्ध चुनावी रणनीतिकार आ जन सुराज पदयात्राक सूत्रधार प्रशांत किशोर बिहारक मुख्यमंत्री नीतीश कुमार पर निशाना साधैत कहलनि जे बिहारक स्थितिमे बेसी बदलाव नहिं आयल अछि। ओ कहलनि, जँ लालू प्रसादक शासन “अपराधीसभक जंगलराज” छल, तऽ नीतीश कुमारक शासन “अधिकारीसभक जंगलराज” अछि। ओ कहलनि जे लोक मुख्यमंत्री नीतीश कुमार आ हुनक शासनक खिलाफ अपमानजनक शब्दक प्रयोग कऽ रहल छथि।
प्रशांत किशोर दावा कयलनि जे नीतीश कुमार सुरक्षा आ सरकारी कर्मचारीक बिना बिहारक कोनो गाममे नहिं चलि सकैत छथि। आइ बिहारमे नौकरशाही, भ्रष्टाचार चरम पर अछि। बिना टाका देने कोनो काज नहिं होइत अछि।
बिहारक दुर्दशाक उल्लेख करैत ओ कहलनि जे जाहि गाम आ पंचायतमे हमरा घुमबाक अवसर भेटल अछि ओतय पलायनक समस्या बहुत पैघ अछि। गाममे ६० प्रतिशत युवा नहिं अछि, पलायन कऽ गेल अछि।
ओ आगू कहलनि जे नीतीश कुमारक शासनक सबसँ पैघ विफलता बिहारमे शिक्षा व्यवस्थाक पतन अछि।
प्रशांत किशोर बिहारमे भूमिहीन लोकक समस्याक उल्लेख करैत कहलनि जे बिहारमे गरीबी आ बेरोजगारीक सबसँ पैघ कारण भूमिहीनक पैघ संख्या अछि। आँकड़ाक अनुसार, बिहारमे ५८ प्रतिशत लोक भूमिहीन छथि, जखन कि देशमे भूमिहीन लोकक संख्या ३८ प्रतिशत अछि।
