भाकपा (माले)क महासचिव दीपांकर भट्टाचार्य बुधदिन दुपहरमे बिरौलक जीरत स्थित पूर्व मंत्री मुकेश सहनीक निवास पर पहुँचलाह। हुनका सांत्वना देलनि। मीडियासँ गप्प करैत ओ कहलनि जे सरकार पूर्ण रूपसँ विफल भऽ गेल अछि, ई स्पष्ट रूपसँ देखबामे आबि रहल अछि। पूर्व मंत्री मुकेश सहनीक पिता जीतन सहनीक हत्याक पूरा बिहारक सभ लोक एक स्वरसँ निन्दा कऽ रहल अछि। नीतीश कुमारक शासनकालमे लोक एतेक असुरक्षित भऽ गेल अछि जे घरमे असगर सुतल एकटा व्यक्तिक हत्या कयल जा रहल अछि। दीपांकर भट्टाचार्य कहलनि जे नीतीश कुमार कहैत छलाह जे बिहारमे सुशासन अछि, मुदा जाहि तरहें अपराध अपन चरम पर अछि, ओ कोनो तरहेँ सुशासन नहिं बुझाइत अछि। हम मुकेश सहनी, हुनकर पूरा परिवारक संग छी। एहेन घटनाकेँ बंद करू। सरकारकेँ लोकक सुरक्षाक गारंटी देबाक चाही। दीपांकर भट्टाचार्य कहलनि जे हम सुनलहुँ जे एहि मामिलामे एसआईटीक गठन कयल गेल अछि, आशा अछि जे हत्यारासभकेँ जल्दीसँ जल्दी सजा भेटत। सत्यकेँ खुलि कऽ सामने आबए दिअ। पूरा बिहारमे जतय कतहु एहेन घटना भऽ रहल अछि, हम कहब जे दोषीकेँ सजा भेटबाक चाही।
एकटा प्रश्नक उत्तरमे ओ कहलनि जे आइ मुहर्रमक दिन अछि, भऽ सकैत अछि जे एहि कारणेँ कांडक उद्भेदनमे देरी भऽ रहल अछि, हम एहि मुद्दा पर प्रशासनसँ गप्प करब। हम आशा करैत छी जे सरकार एहि मामिलामे बिना देरी कयने कारवाई करत। नीतीश कुमार २० सालसँ सरकार चला रहल छथि। एहिमे मात्र दूटा नारा अछि, विकास आ सुशासन। बिहारमे विकासक नाम पर गरीबी कम नहिं भेल अछि, सर्वेक्षणसँ ई पता चलल अछि। किछु पुल आ पुलियाक बात होइत छल, ई विकासक सपना सेहो टूटय लागल अछि। पुल ढहि रहल अछि आ लोक मारल जा रहल अछि, तखन बिहारमे की बचल अछि ? एहि अवसर पर आराक सांसद सुदामा प्रसाद, विधान पार्षद शशि यादव, पोलित ब्यूरो सदस्य धीरेन्द्र झा, जिला सचिव बैद्यनाथ यादव, प्रदेश समिति सदस्य अभिषेक कुमार, जिला परिषद सदस्य सुमित्रा देवी, अशोक पासवान, पप्पू पासवान, हरि पासवान, धर्मेश यादव, ईश्वर दयाल सिंह, केशरी यादव, प्रिंस राज, दिनेश यादव आदि उपस्थित छलाह।
