नीतीश कुमार व्यक्तिगत स्तर पर कहियो परिवारकेँ राजनीतिमे नहिं अनलनि : संजय झा
पटना
*
जदयू कोटासँ राज्यसभा नेता संजय झा चुनाव प्रचार करबा लेल आइ पटना हवाई अड्डा पहुँचलाह। एहि दौरान ओ मीडियाक कतेको प्रश्नक उत्तर देलनि।
राजद सुप्रीमो लालू प्रसाद यादवक दूनू बेटी मीसा भारती आ रोहिणी आचार्य २०२४ केर लोकसभा चुनाव लड़ि रहल छथि। पैघ बेटी मीसा भारती दू बेर पाटलिपुत्र लोकसभा क्षेत्र हारलाक बाद तेसर बेर चुनावी मैदानमे छथि, जखन कि छोट बेटी रोहिणी आचार्य सारण सीटसँ चुनाव मैदानमे छथि। ओना, राजगक नेता लालूक दूनू बेटीकेँ चुनाव मैदानमे आबय पर लगातार बयान दऽ रहल छथि।
ओतहि शनि कऽ जेडीयू कोटा केर राज्यसभा नेता संजय झा रोहिणी आ मीसाक चुनाव लड़बा पर लालू आ नीतीशक बीच बड़का तुलना कयलनि अछि। संजय झा कहलनि अछि जे नीतीशजी परिवारकेँ व्यक्तिगत स्तर पर कहियो राजनीतिमे नहि अनलथि।
संजय झा चुनाव प्रचार करय लेल पटना हवाई अड्डा पहुँचलाह, जतय मीडियाक संग बातचीतक दौरान ओ कहलनि कि हम मीसा भारती आ रोहिणी आचार्य पर कोनो व्यक्तिगत टिप्पणी नहिं करय चाहैत छी, मुदा एतबा अवश्य कहब की नीतीश कुमार कहियो व्यक्तिगत स्तर पर परिवारकेँ राजनीतिमे नहिं अनलनि। ओ कहियो पारिवारिक स्तरक राजनीति नहिं कयलनि। ओ १९८५ सँ राजनीतिमे छथि आ १८ वर्षसँ मुख्यमन्त्री छथि, एहिसँ पहिने ओ केन्द्रमे राजनीति कऽ रहल छलथि, मुदा परिवारक कोनो सदस्यकेँ अपन राजनीतिमे नहिं अनने छथि।
राजगमे शामिल होबयसँ पहिने मुख्यमंत्री नीतीश कुमार २४ फरवरीकेँ कर्पूरी जयंतीक अवसर पर भरल मंचसँ कहने छलाह जे कर्पूरी जी कहियो परिवारकेँ समर्थन नहिं कयलनि, परिवारवादक खिलाफ चलैत छलाह। हम सभ राजनीतिमे सेहो कहियो परिवारक समर्थन नहिं कयलहुँ। हम अपन परिवारक सदस्यकेँ कहियो राजनीतिमे नहिं अनलहुँ। किछु लोक परिवारकेँ आगू बढ़ेबामे लागल छथि। आब चुनावक समय संजय झा एक बेर फेर एहन बयान दऽ कए लालू परिवारक राजनीति पर हवा तेज कऽ देलनि।
