मुख्यमंत्री नीतीश कुमार बुधकेँ दिल्ली पहुंचलाह। हुनका संग राज्यसभा सांसद संजय झा सेहो छलाह। नीतीश कुमार एनडीए केर बैसारमे शामिल भेलाह। आब सांसद सभ सेहो पहुंचयवाला छथि।
केंद्रमे एक बेर फेर एनडीए सरकार बनय जा रहल अछि। एहिसँ पहिने बिहारक मुख्यमंत्री नीतीश कुमार अपन सभटा विजयी सांसदकेँ दिल्ली बजेलनि अछि। सभ सांसद शुक्र दिन (०७ जून) दिल्ली पहुंचताह। दिल्लीमे सभसँ भेंट होएत।
जे जानकारी सामने आबि रहल अछि ओकर अनुसार सब विजयी उम्मीदवार जेडीयू केर राष्ट्रीय अध्यक्ष आ बिहारक मुख्यमंत्री नीतीश कुमारकेँ भेंट करय लेल फोन कयलनि। ओ सभ कहलखिन जे ओ हुनका सभसँ भेंट करए चाहैत छथि। एहि पर मुख्यमंत्री नीतीश कुमार सबके भेंट करबाक लेल दिल्ली बजौलनि। एहिसँ पहिने बुधदिन मुख्यमंत्री नीतीश कुमार दिल्ली पहुंच गेलाह। हुनका संग राज्यसभा सांसद संजय झा सेहो छलाह। नीतीश कुमार एनडीए केर बैसारमे शामिल भेलाह। जेडीयू सरकार बनेबाक लेल राजगकेँ समर्थन देलक अछि।
मुंगेर लोकसभा सीटसँ जीतल ललन सिंह बुधेदिन दिल्ली चलि गेलाह। बुधदिन दिल्लीमे भेल बैसारमे जेडीयू केंद्रमे सरकार बनेबाक लेल राजगकेँ अपन समर्थन देलक। दोसर दिस, सभ सांसदक दिल्ली बजाबय पर राजनीतिक बाजार गर्म अछि।
जेडीयू एहि बेर बिहारमे १२ सीट पर जीत हासिल कयलक अछि। पार्टी १६ सीट पर चुनाव लड़लक। चारिटा सीट नहिं जीति सकल। भाजपा सेहो १२ सीट जीतल अछि। भाजपा १७ सीट पर चुनाव लड़ल। २०१९ केर लोकसभा चुनावक परिणामकेँ देखैत एहि बेर बिहारमे एनडीए केर ९ सीट कम भेल अछि। २०१९ मे एनडीए केर ३९ सीट भेटल छल। एहि बेर मात्र ३० सीट भेटल अछि। चिराग पासवानक प्रदर्शन सर्वश्रेष्ठ रहल। चिरागक पार्टी पाँचटा सीट पर चुनाव लड़लक आ सभटा सीट पर जीत हासिल कयलक।
