मुख्यमंत्री नीतीश कुमार शुक्रकेँ पीएम नरेंद्र मोदीक खूब प्रशंसा कएलनि। ओ कहलनि जे पीएम मोदी एतय कतेको योजनाक उद्घाटन आ शिलान्यास कय रहल छथि। एही सभक लागत 48,500 करोड़सँ अधिक अछि। ओ कहलनि जे बिहार निरंतर विकास कय रहल अछि। ओ एही क्रममे विपक्ष पर निशाना साधलनि।
पीएम नरेंद्र मोदी रोहतासक बिक्रमगंजमे जनसभाकेँ संबोधित कएलनि। एहिसँ पहिने मुख्यमंत्री नीतीश कुमार जनसभाकेँ संबोधित कएलनि। ओ पीएम मोदीकेँ एतय आबय पर प्रसन्नता प्रकट कएलनि आ कहलनि जे ई बहुत खुशीक बात अछि। ओ कहलनि जे एहि योजनासँ बिहारक जनताकेँ बहुत फायदा होयत। एहि लेल ओ पीएम मोदीकेँ धन्यवाद दैत छथि।
मुख्यमंत्री नीतीश कुमार विपक्ष पर निशाना साधैत कहलनि कि, “एक बेर याद दियाबए चाहैत छी जे जखनि हमर सभक सरकार नवम्बर 2005 मे बनल, तकर बाद कतेक काज भेल। ताहिसँ पहिने कोनो काज की भेल छल ? हम सभ महिलाक लेल कतेको काज कयलहुँ। महिलाक लेल आरक्षण व्यवस्था लागू कएल गेल। आब ओ सभ पढ़ि रहल छथि, नौकरी लऽ रहल छथि। हम सभ बिहारक विकासक काज कय रहल छी।”
ओ कहलनि, शिक्षा आ स्वास्थ्यक क्षेत्रमे विशेष ध्यान देल गेल अछि। सड़क आ पुलक निर्माण कएल गेल अछि। सभ घर धरि नलक जल, बिजली पहुँचाओल गेल अछि। मुख्यमंत्री नीतीश कुमार केन्द्र सरकारक जातीय जनगणना कराबय केर निर्णय पर प्रसन्नता व्यक्त करैत कहलनि कि हम एकरा लेल पीएम मोदीकेँ नमन करैत छी। दोसर दिसि विपक्षक आलोचना करैत मुख्यमंत्री कहलनि कि आब दोसर पार्टीक लोक क्रेडिट लेबामे लागल छथि। हम पहिने जातीय गणना कराबय केर निर्णय लेलौंह, बिहारमे एकरा प्रमुखतासँ कराओल गेल।
मुख्यमंत्री नीतीश कुमार उपस्थित लोककेँ कहि रहल छलाह कि ककरो बहकाबामे नहि आबी। ओ लोककेँ ठाढ़ भऽ कऽ पीएम मोदीक अभिवादन करबाक अनुरोध कयलनि। सभ लोक ठाढ़ भऽ कऽ पीएम मोदीक अभिवादन कयलनि। मंच पर उपस्थित पीएम मोदी सेहो ठाढ़ भऽ कऽ सभक अभिवादन स्वीकार कयलथि। तत्पश्चात् प्रधानमंत्री नरेंद्र मोदी 48,520 करोड़ रुपयासँ बेसी लागतक कतेको विकास परियोजनाक उद्घाटन, शिलान्यास आ लोकार्पण कयलनि।
