बिहारमे मुख्यमंत्री नीतीश कुमार आइ महिलाक लेल विशेष पिंक बस सेवाक शुभारंभ केलनि। पटना, मुजफ्फरपुर, दरभंगा, पूर्णिया, भागलपुर आ गयामे कुल 20टा बस शुरू कयल गेल अछि। एही बसमे सीसीटीवी, जीपीएस आ अलार्मक सुरक्षा सुविधा अछि। तथापि, महिला ड्राइवरक कमी केर कारण एखनि पुरुष ड्राइवर बस चलाओत। आगाँ 166 आओर बस जोड़बाक योजना अछि।
बिहारमे मात्र महिलाक लेल पिंक बस सेवा केर शुरुआत काल्हि भेल। मुख्यमंत्री नीतीश कुमार एक अणे मार्गसँ 20 बसकेँ हरियर झंडी देखौलनि। राज्यक कुल 6 शहर जाहिमे पटनाक लेल 8, मुजफ्फरपुर 4, दरभंगा 2, पूर्णिया 2, भागलपुर 2 आ गया लेल 2 बसक सेवा काल्हिसँ शुरू भेल अछि।
पुरुष ड्राइवर संग महिला कंडक्टर सभटा बसमे मौजूद रहत। सभ शहरी क्षेत्रमे ई बस सेवा मौजूद रहत। एहि पर केवल महिला सवारी कय सकैत छथि। पिंक बसमे सीसीटीवी सँ जीपीएस आ अलार्म धरि लागल अछि। सुरक्षित, सस्ता आ सुलभ यात्रा पिंक बस सेवाक उद्देश्य अछि। आगाँ कुल 166 आओर बसकेँ अंतरजिला पिंक बस सेवा शुरू करबा केर तैयारी अछि।
पटनामे ई बस शुरूमे चारि रूट पर चलत। एहिमे गांधी मैदानसँ फुलवारीशरीफमे एम्स-पटना, दानापुर आ कुर्जी (बोरिंग रोडक माध्यमसँ) आ एनआईटी-मोड़सँ कंकड़बाग ऑटोरिक्शा स्टैंड शामिल अछि। अधिकारीक अनुसार, एकतरफा यात्रा लेल न्यूनतम किराया 6 रुपैया आ अधिकतम 35 रुपैया होयत। प्रीपेड कार्ड, महीनाक आ छात्र पास जकाँ अलग-अलग सुविधा उपलब्ध अछि। महिला बस चालक पर अधिकारी कहलनि कि हम महिला चालक सभकेँ सेहो ट्रेनिंग देब।
परिवहन मंत्री शीला कुमारी कहलनि कि पिंक बस सेवा सामाजिक सशक्तीकरणक दिशामे एकटा महत्वपूर्ण डेग साबित होएत। ओ कहलनि कि एहिसँ महिलाक आत्मविश्वास बढ़त। भविष्यमे पिंक बस सेवाक विस्तार दोसर शहर सभमे सेहो कयल जायत। 80 आओर पिंक बस पहिनेसँ पाइपलाइनमे अछि।
