नीतीश कुमार सर्वमान्य मुख्यमंत्री, कोनो खेला-वेला संभव नहिं
नीतीश कुमार सर्वमान्य मुख्यमंत्री, कोनो खेला-वेला संभव नहिं
मिडिया खास कऽ इलेक्ट्रॉनिक मीडियाकेँ बस मशाला चाही, आखिर समय सेहो खपाबय केर रहैत छैक, कतयसँ अनतै समाचार, तऽ मुँहमे हाथ दऽ कऽ नेता सभसँ किछुओ बजाओत आ तकरा अपना हिसाबें नून-मिरचाई लगाकेँ किछुओ चलाओत।
जनता सभ जानैत छैक आ ताहूमे बिहारक जनता कनी बेसिये सभ दिनसँ। एतय प्रचंड बहुमत एनडीएकेँ भेटल अछि, अर्थात नहिं भाजपाकेँ आ नहिं जदयूकेँ। दुनूक भिन्न-भिन्न विचारधाराक लोक सम्मलित रुपसँ वोट देलक अछि, अर्थात भाजपाक केंडिडेटकेँ भाजपा समर्थक, जदयू समर्थक आ तहिना अन्य तीन दलक समर्थक सेहो वोट देलक अछि आ तहिना जदयूकेँ सेहो जदयू समर्थक, भाजपा समर्थक आ तहिना बाकी सहयोगी तीन दलक समर्थक वोट देलक अछि, कहय केर अर्थ जे कियो मात्र अप्पन विचारधारावाला मतदाताक बदौलत नहिं जीतलौंह अछि, बल्कि सम्मिलित विचारधारावाला मतसँ जीतलौंह अछि।
तऽ ई बात सेहो स्पष्ट अछि कि एखनि केंद्रमे जेना नरेन्द्र मोदीक टक्करमे कियो नहिं अछि तहिना बिहारमे नीतीश कुमारक टक्करमे कियो नहिं अछि, आब तऽ नरेन्द्र मोदी बिहारक मुख्यमंत्री बनय नहिं अओताह, तऽ तखनि बिहारमे नीतीश कुमारक टक्करमे कियो नहिं। दोसर बात जे डंकाक चोट पर ई बिहारक चुनाव नीतीश कुमारक नेतृत्वमे लड़ल गेल अछि, अर्थात नीतीश कुमार प्रायः बिहारक सभ विचारधारावाला लोकक सर्वमान्य नेता छथि, तें कोनो दोसर मुख्यमंत्रीवाला बात भाजपा सोचबे नहिं करत, ई मात्र कहबे कयलौंह जे मिडियाक गप्पसँ गप्प निकालयवाला बात छैक।
मानि लिअ कनी काल लेल मिडियाक गप्प सही जे महाराष्ट्रक शिंदे जँका एतहु बिहारमे भाजपा कऽ सकैत अछि, तऽ ई महाराष्ट्र नहिं बिहार छैक, एतय केर लोक बहुत भावनात्मक होइत अछि आ छलिया बर्दाश्त नहिं होइत छैक, से होइतैक तऽ विपक्षक बड़का-बड़का वादा पर विश्वास कऽ लैत आ उलट स्थिति होइतैक, मुदा वास्तविकता भाँपि लेलक बिहारक जनता। तें एखनि नीतीश कुमारक संग कोनो प्रकारक खेलसँ भाजपा बिहारमे अपन साख गंवा सकैत अछि, आ जकर साख एकबेर चलि गेल ओ पुनः पीढ़ी दर पीढ़ी कायम रहैत छैक, ई बात भाजपासँ अधिक के बुझत जे एहू चुनावमे जंगलराजक कार्ड जमिकेँ चलौलक अछि। तें बिहारक जनताक मिजाजक विरुद्ध भाजपा किन्नौंह ने काज करत जँ विवेक बाँचल रहतैक तऽ , कारण ई तय छैक जे जीत एनडीए केर भेल अछि आ नीतीश कुमारक नेतृत्वमे भेल अछि एवं नीतीश कुमार बिहारक जनताक सर्वमान्य नेता छथि। बिहारक परिप्रेक्ष्यमे आब नीतीश कुमार ऐतिहासिक विकास पुरुष वा युग पुरुष भऽ गेल छथि, तें कोनो प्रकारक खटासक बदला युगल जोड़ीक सरकारक रफ्तार जारी राखि आनंद लिअ, एहीमे दुनूक भलाई, बल्कि मिडियाक सभ अनर्गल बातकेँ जोरदार ढ़ंगसँ खारिज कऽ अपन साख आओर बनाउ, जनता डबल इंजन सरकारक जयजयकार करैत रहत, कारण इएह अछि एखनि जनताक मिजाज, अन्यथा सभ साख गमा देब, जनता इएह डबल इंजनक सरकार लगातार चाहैत अछि आ मुख्यमंत्री नीतीशे कुमार सेहो रहथि इहो चाहैत अछि, कारण नीतीश कुमार पर अटल विश्वास प्रायः सभ विचारधारावाला जनताक छैक, नीतीश कुमार बिहारक सर्वमान्य नेता आ मुख्यमंत्री छथि।
आब मिडियाक समाचार बनेबाक ढ़ंग देखू, कारण मिडिया सभकिछु जनैत अछि जे भाजपा चाहबो करत तऽ एखनि केंद्रक पेंच फँसल छैक, किछु नहिं कऽ सकैत अछि, कारण तखनि बिना नीतीश कुमारक केंद्रमे पेंच फँसि जयतैक, मुदा तखनो ताहि एंगलकेँ दरकिनार कऽ महाराष्ट्रक शिंदेवाला हालक हवाला विपक्ष आ मिडिया दुनू दैत अछि। तें एतय एखनि प्रायः कोनो खेलावेला संभव नहिं, दुनूकेँ एक-दोसरक आवश्यकता अछि, आ ई स्थिति बिहारक जनताक लेल अनुकूल अछि।
