बिहार विधानसभामे विपक्षक नेता तेजस्वी यादव मुख्यमंत्री नीतीश कुमार पर व्यक्तिगत हमला कयलनि अछि। ओ एक बेर फेर हुनक खराब स्वास्थ्यक हवाला दैत मुख्यमंत्रीक पद छोड़बाक सलाह देलनि।
बिहार विधानसभा चुनावक लेल मोतिहारी पहुँचल तेजस्वी यादव कहलनि जे मुख्यमंत्री नीतीश कुमारक यात्रा झूठक यात्रा अछि। सीएम नीतीश कुमारकेँ अपहरण कए लेल गेल अछि। किछु लोक दिल्लीमे छथि आ किछु अईठाम छथि। ओ सभ अपन लाभ लेल एतय सरकार चला रहल छथि। मुख्यमंत्री होशमे नहि छथि आ निर्णय लेबामे सक्षम नहि छथि। ओ थाकि चुकल छथि आ सेवानिवृत्त अधिकारीक संग मिलीभगतसँ बिहार सरकार चला रहल छथि।
नीतीश कुमारक राजदमे वापसी पर तेजस्वी यादव कहलनि कि राजदमे शामिल हेबाक कोनो सवाल नहि अछि। मीडिया कहैत रहैत अछि जे नीतीश कुमार आबि जयताह। ओहि बात केर एक जगह पर रहए दियौ। लालूजीक अंदाज अछि जे जखनि पत्रकार हुनकासँ पुछलखिन तखन ओ कहि देलनि। अहाँसभ जनिते छी।
प्रशांत किशोरक आमरण अनशन पर प्रतिक्रिया दैत तेजस्वी यादव कहलनि, “छात्र चाहैत छलथि जे एहि आंदोलनक कोनो प्रकारसँ राजनीतिकरण नहिं होय। जखनि लाठीचार्ज भेल छल तखन ओ कतए छलाह ? ओ सभ आब आबि रहल छथि। हम विधानसभामे इ मुद्दा उठौलहुँ। छात्रक प्रति सम्मानक कारणेँ हम नैतिक समर्थन देलहुँ। छात्रक कहला पर हम एहि मामिलाक बारेमे एक बेर नहिं बल्कि दू बेर मुख्यमंत्रीकेँ चिट्ठी लिखलहुँ। २८ नवम्बरकेँ महागठबंधनक लोक विधानसभामे ई मुद्दा उठौलक। मुदा, एकरा कुचलए केर कोशिश भेल। ई बीपीएससी अभ्यर्थी सभक आन्दोलन आ हुनकर लड़ाई अछि। हम हुनकर संग छी। छात्रक संग अन्याय भेल अछि आ जाबति धरि न्याय नहि भेटत ताबति धरि हम हुनका सभक सङ्ग ठाढ़ छी।”
प्रशांत किशोर मात्र अभिनय कए रहल छथि। जन सुराजक संस्थापक प्रशांत किशोरक आमरण अनशनक बदला वैनिटी वैनक उपयोगक संबंधमे तेजस्वी कहलनि जे अभिनेता आ अभिनेत्री वैनिटी वैनमे बैसैत छथि।
