मुख्यमंत्री नीतीश कुमार मंगलदिन सिमरियाक गंगाक तट पर कल्पवास मेलाक निरीक्षण कयलनि। ओ नवनिर्मित नदी तट पर गंगा पूजन कयलनि। संगहि ओ नवनिर्मित धर्मशालाक निरीक्षण कयलनि आ काज जल्दिये पूरा करबाक निर्देश देलनि।
एहि दौरान बेगूसरायक डीएम तुषार सिंगला, एसपी मनीष सहित पैघ संख्यामे वरिष्ठ पदाधिकारी उपस्थित छलाह आ सुरक्षाक पर्याप्त व्यवस्था सेहो कयल गेल छल। बिहारक मुख्यमंत्री नीतीश कुमार मंगल दिन भोरे बेगूसराय पहुँचलाह। हुनका संग जल संसाधन मंत्री विजय चौधरी आ जदयू केर कार्यकारी अध्यक्ष संजय झा छलाह। एतय ओ बेगूसरायक प्रसिद्ध सिमरिया गंगा घाटपर कल्प बासीसँ भेंट कयलनि आ गंगा घाट आ छठि घाटक जायजा लेलनि।
सिमरियामे ११८ करोड़क लागतसँ सिमरियाक जीर्णोद्धारक काज लगभग अन्तिम चरणमे अछि, जतय प्रशासन दावा कऽ रहल अछि जे सिमरियाकेँ हरिद्वारक तर्ज पर सजाओल जा रहल अछि।
मुख्यमंत्री नीतीश कुमार सिमरियामे नवनिर्मित धर्मशालाक निरीक्षण सेहो कयलनि आ अधिकारीकेँ निर्देश देलनि जे काज जल्दीये पूरा कएल जाए। मुख्यमंत्री निर्माणाधीन छह लेन वला पुलक सेहो दौरा कयलनि।
बिहारक खेल मंत्री सुरेन्द्र मेहता कहलनि जे मुख्यमंत्री सिमरियामे विकास कार्यक निरीक्षण कयलनि अछि आ पदाधिकारीकेँ निर्देश सेहो देलनि अछि। ओ कहलनि जे मुख्यमंत्री सिमरियामे चलि रहल विकास कार्य पर संतोष व्यक्त कयलनि अछि आ काज जल्दीये पूरा करबाक निर्देश सेहो देलनि अछि।
