बीजेपी केर पूर्व सांसद अश्विनी चौबे बिहारक मुख्यमंत्री नीतीश कुमारकेँ उप प्रधानमंत्री बनाबक समर्थन कएलनि अछि। चौबेकेँ विश्वास अछि जे नीतीश कुमार प्रधानमंत्री मोदी संग कंधासँ कंधा मिला कए काज कऽ रहल छथि आ हुनका एहि पद लेल योग्य मानल जाए। ओ कहलनि जे एहिसँ बिहारक विकास होयत।
भारतीय जनता पार्टी (बीजेपी) केर पूर्व सांसद अश्विनी चौबे नीतीश कुमारसँ संबंधित एकटा पैघ बयान देलनि अछि। बक्सर केर पूर्व सांसद अश्विनी चौबे कहलनि अछि जे नीतीश उप-प्रधानमंत्री (डिप्टी पीएम) पदक लेल सक्षम छथि। अश्विनी चौबे कहलनि जे जेना नीतीश कुमार प्रधानमंत्री नरेंद्र मोदीक कनहासँ कनहा मिलाकऽ चलि रहल छथि, हुनका उप प्रधानमंत्री बना देल जाय। ओ कहलनि जे नीतीश कुमार उप प्रधानमंत्री बनि जाथि त’ बिहारक विकास होयत आ जगजीवन रामक बाद बिहारसँ दोसर उप प्रधानमंत्री भेटत।
एहि सबसँ पहिले पिछुलका वर्ष लोकसभा चुनावक दौरान एकटा रिपोर्ट आयल छल, जाहिमे कहल गेल छल विपक्षी दल सभक नेतृत्व इंडिया गठबंधन जनता दल (यूनाइटेड) केँ लुभाबै लेल नीतीश कुमारकेँ उप प्रधानमंत्रीक प्रस्ताव देने छल। मुदा तकरा बाद नीतीश समय-समय पर स्पष्ट कहैत आएल छथि जे ओ एनडीए छोड़िक’ कतौह नहि जेताह। ओ कहलथि जे एक-दू बेर एम्हर-ओम्हर भ’ गेल छल, मुदा आब नहि होएत।
चुनाव आयोगक अनुसार, 2024 केर चुनावमे बीजेपी 240 सीट जीतल, जे 2019 केर 303 केर मुकाबिला कम अछि। दोसर दिसि, कांग्रेस 99 सीट जीतल। बीजेपीक नेतृत्व वाला एनडीए 293 सीट जीतल। नरेंद्र मोदी तेसरी बेर देशक प्रधानमंत्री बनलाह। मुदा बीजेपीकेँ सत्ता तक पहुँचाबयमे जेडीयू आ टीडीपीक महत्वपूर्ण भूमिका रहल। एम्हर, एहि साल बिहारमे विधानसभा चुनाव सेहो होबऽ बाला अछि। बीजेपीक कतेको नेता कहलथि जे राज्यक चुनाव नीतीश कुमारक नेतृत्वमे लड़ल जायत। बिहारक डिप्टी सीएम सम्राट चौधरी कहलथि जे एनडीए बिहारमे नीतीश कुमार आ प्रधानमंत्री नरेंद्र मोदीक नेतृत्वमे काज कऽ रहल अछि आ हम दुनू नेताक नेतृत्वमे चुनाव लड़ब।
