बिहारमे आइ मुख्यमंत्री नीतीश कुमारक अध्यक्षतामे भेल कैबिनेटक बैसारमे एकटा पैघ निर्णय केर मंजूरी देल गेल। राज्य सरकार राज्यक लगभग ९४ लाख परिवारकेँ २-२ लाख टाकाक सहायता देत। यद्यपि मुख्यमंत्री एकर घोषणा पहिनहिं कऽ चुकल छलाह मुदा आइ मंत्रिमंडलक बैसारमे एहि निर्णयकेँ मंजूरी देल गेल।
दरअसल किछु मास पहिने भेल जातिगत जनगणनाक बाद मुख्यमंत्री नीतीश कुमार घोषणा केने छलाह जे राज्यक गरीब परिवारकेँ राज्य सरकार सँ २-२ लाख रुपया केर आर्थिक सहायता देल जाएत। जाति आधारित जनगणनामे ९४ लाख परिवार भेटल जिनकर मासिक आय ६,००० रुपैयासँ कम छल।
जानकारीक अनुसार आइ कैबिनेट बैसारमे कुल १८ एजेंडा तय कयल गेल।
उद्योग विभागक अन्तर्गत राज्यक विभिन्न वर्गक गरीब परिवारक आर्थिक विकासक लेल बिहार लघु उद्यमी योजनाकेँ मंजूरी देल गेल।
संगहि पिछड़ा वर्ग आ अति पिछड़ा वर्ग कल्याण विभागकेँ तहत मुख्यमंत्री अति पिछड़ा वर्ग सिविल सेवा प्रोत्साहन योजनाक तहत एकटा निश्चित दरक अनुसार विभिन्न परीक्षा पास करय वाला अभ्यर्थीकेँ प्रोत्साहन राशि प्रदान कैल जायत। एकरा लेल ९ करोड़ ७९ लाख ५० हजार वार्षिक व्यय केर मंजूरी देल गेल।
संघ लोक सेवा आयोग द्वारा आयोजित भारतीय अभियांत्रिकी सेवा, भारतीय आर्थिक सेवा, भारतीय सांख्यिकी सेवा आ संयुक्त भूवैज्ञानिक परीक्षा सन प्रतियोगी परीक्षामे सफल अभ्यर्थी सभकेँ ७५,००० रुपैयाक प्रोत्साहन राशि देल जायत।
सीडीएस, सीबीआई, सीएपीएफ, एनडीए परीक्षा पास कयनिहार अति पिछड़ा वर्गक अभ्यर्थी सभकेँ ५०,००० टाकाक प्रोत्साहन राशि देल जायत। बिहार न्यायिक सेवाक प्रारंभिक परीक्षा उत्तीर्ण कयला पर ५०,००० रुपयाक प्रोत्साहन राशि सेहो देल जायत।
