भाजपा नेता आ महाराष्ट्रक मंत्री नितेश राणे सोमदिन हलाल आ झटका मीटक मुद्दा उठौलनि। संगहि ओ हिन्दूसभसँ अपील कयलनि अछि जे ओ मात्र हिन्दू दोकानसँ माँस कीनथि, किएक तँ ओतय हुनका मिलावट नहि भेटत।
ओ कहलनि “आइ हम महाराष्ट्रमे हिन्दू समुदायक लेल एकटा बहुत महत्वपूर्ण डेग उठा रहल छी। एहि अवसर पर मल्हार सर्टिफिकेशन डॉट कॉम केर शुभारंभ कयल जा रहल अछि। मल्हार प्रमाणीकरणक माध्यमसँ हमरासभकेँ अपन मटनक दोकान खोलबाक सुविधा भेटत, जे १०० प्रतिशत हिन्दू बहुल होयत आ ओकरा बेचयवला व्यक्ति सेहो हिन्दूए होयत। मटनमे कतहु मिलावट नहि भेटत।”
ओ पोस्टमे आगू कहलनि, “एहि अवसर पर हम अहाँसँ अपील करैत छी जे मल्हार प्रमाणीकरणक बेसीसँ बेसी उपयोग करू आ ओहि स्थानसँ मटन नहि कीनू जतय मल्हार प्रमाणन उपलब्ध नहि अछि। ई प्रयास निश्चित रूपसँ हिन्दू समुदायक युवासभकेँ आर्थिक रूपसँ सशक्त बनओत।”
जनतब अछि जे एहिसँ पहिने नितेश राणे महाराष्ट्र नवनिर्माण सेना (मनसे)क प्रमुख राज ठाकरेक प्रयागराजमे हालहिमे सम्पन्न कुम्भ मेला पर विवादित बयान पर प्रतिक्रिया देने छलाह। भाजपा नेता नितेश राणे कहने छलाह जे राज ठाकरेकेँ पीएम मोदीक नेतृत्वमे चलि रहल ‘नमो गंगे’ स्वच्छता अभियानक पूर्ण जानकारी नहि अछि। राणे कहने छलाह जे हिन्दू धर्मक अपमान करबाक अधिकार केकरो नहि अछि।
राज ठाकरे रविदिन कहने छलाह जे ओ गंगाक पानिकेँ नहिं छू सकैत छथि आ नहिं पीबि सकैत छथि, कियैक तँ एतेक लोकक स्नान कयलाक बाद ई साफ नहि भऽ सकैत अछि।
