पिकनिक स्थलक रूपमे प्रसिद्ध राजनगर राज पैलेसमे अंग्रेजी नव वर्षक अवसर आई भोरु पहरसँ लोकक हुजूम लागल रहल। राज पैलेस पहुँचय बला सभ रास्ता दू-दू किलोमीटर दूरहिसँ जाम छल। दूर-दूरसँ पिकनिक मनयबा लेल पहुँचय बलामे सँ लोकमे नेपालक लोक सभ सेहो छलाह।
राज पैलेसमे लोकसभ फराक-फराक ढंगसँ नव सालक पहिल दिन मनोरंजन सँग बितौलनी। डीजे पर कतौह थिरकैत युवा सभक टोली तऽ कतहु समूहमे झुमति बालिका सभक हुजूम ।कतहु भुजा पार्टी तऽ कतहु भिन्न-भिन्न व्यंजन। दिन भरि राज पैलेस झूमति रहल।
नेना भुटका लेल बुझु मस्तीक भंडार खुजि गेल छल। मिक्की माउस, झूला, रेल झूला, नाव झूला सहित भाँति-भाँतिक मनोरंजन आ खाद्द पदार्थक सँग लोक सभ नव सालक आनन्द मनौलनि। बजुर्ग सभ सेहो कतहु भुजा पार्टी तऽ कतहु मूंगफली पार्टीक आयोजन कयने छलाह।
