पश्चिम बंगालक मुख्यमंत्री आ टीएमसी प्रमुख ममता बनर्जी प्रधानमंत्री नरेन्द्र मोदीकेँ पत्र लिखने छथि। पत्रमे टीएमसी प्रमुख ममता बनर्जी तीनू आपराधिक कानूनक विरोध दर्ज कयने छथि आ ओकरा लागू नहिं करबाक आग्रह कयलनि अछि।
बतबैत चली जे ई तीनू आपराधिक कानून १ जुलाईसँ लागू होबयवला अछि।
टीएमसी प्रमुख ममता बनर्जीक ई पत्र एहन समयमे आयल अछि जखन १८म लोकसभाक पहिल सत्र २४ जूनसँ शुरू होबयवला अछि।
ममता खतमे लिखलनि, “जँ अहाँकेँ मोन अछि तँ पछिला साल २० दिसम्बरकेँ अहाँक सरकार ई तीनू महत्वपूर्ण कानून एकतरफा आ बिना कोनो बहसक पारित कयलक। ओहि दिन लगभग १०० लोकसभा सदस्यकेँ निलम्बित कऽ देल गेल आ दुनू सदनक कुल १४६ सांसदकेँ संसदसँ निष्कासित कऽ देल गेल। लोकतंत्रक ओहि कारी समयमे विधेयक केर तानाशाही तरीकासँ पारित कयल गेल। आब एहि मामिलाक समीक्षा करबाक चाही। आब हम अहाँसँ आग्रह करैत छी जे कमसँ कम नव कानूनक कार्यान्वयनक तिथि स्थगित करबा पर विचार करू।”
ओ आगू लिखलनि “हमर मानब अछि जे एहि महत्वपूर्ण कानूनसभमे कयल गेल परिवर्तनकेँ नव निर्वाचित संसदक समक्ष नव विचार-विमर्श आ जाँचक लेल राखब उचित होयत। ई दृष्टिकोण नव निर्वाचित प्रतिनिधिसभकेँ प्रस्तावित कानूनक गहराईसँ जाँच करबाक अवसर प्रदान करत।”
