बिहारमे मतदाता सूचीक गहींर संशोधन (एसआईआर) आ सत्यापन भऽ रहल अछि। एहि दौरान नेपाल, बांग्लादेश आ म्यांमारक लोक बेसी संख्यामे भेटल अछि।
एहि साल बिहारमे विधानसभा चुनाव होबय वाला अछि। ओहिसँ पहिने मतदाता सूचीक गहन संशोधन (एसआईआर) आओर सत्यापनक काज भऽ रहल अछि। एहि डोर टू डोर सत्यापन अभियानक दौरान नेपाल, बांग्लादेश आ म्यांमारक लोक भारी संख्यामे भेटल अछि।
अधिकारी ई जनतब रविदिन देलनि। ओ कहलनि जे, 1 अगस्तक बाद एहेन लोकक उचित सत्यापनक बाद 30 सितंबरकेँ प्रकाशित होबय वाला अंतिम मतदाता सूचीमे अवैध प्रवासीक नाम शामिल नहि होएत।
ग्राउंड रिपोर्टक हवाला दैत निर्वाचन आयोगक अधिकारी कहलनि जे, नेपाल, बांग्लादेश आ म्यांमारक भारी संख्यामे लोक बूथ स्तरीय अधिकारी (बीएलओ) केँ डोर टू डोर सत्यापनक दौरान भेटल अछि। चुनाव आयोग अंततः भारतभरिमे मतदाता सूचीमे विशेष गहन संशोधन कय विदेशी अवैध प्रवासीक जन्म स्थानक जांच कय ओकरा हटाबय केर काज करत।
बिहारकेँ एहि साल चुनावमे जेबाक अछि, जखनि कि असम, केरल, पुडुचेरी, तमिलनाडु आ पश्चिम बंगाल सहित पांचटा आओर राज्यमे 2026 मे विधानसभा चुनाव होबय वाला अछि, एसआईआर केर प्रक्रिया 24 जूनसँ शुरू भेल छल आ गणना फॉर्म जमा करबाक अंतिम तारीख 25 जुलाई 2025 अछि।
एसआईआर केर प्रक्रिया
बूथ लेवल ऑफिसर (बीएलओ) घर-घर जा कए गिनती आ सर्वेक्षण कय रहल छथि।
जाहि मतदाताक नाम 1 जनवरी 2003 केर मतदाता सूचीमे शामिल छल, हुनका केवल गणना फॉर्म भरि कय जमा करय पड़त।
जिनकर नाम 2003 केर बाद जोड़ल गेल अछि वा पहिल बेर मतदाता बनि रहल छथि हुनका नागरिकता आओर उम्र साबित करय लेल कागजात जमा करय पड़त।
मतदाता 1 सितंबर 2025 तक अपन दस्तावेज जमा कय सकैत छथि।
बिहार विधान सभाक वर्तमान कार्यकाल 22 नवंबर 2025 केँ समाप्त भऽ रहल अछि, चुनाव प्रक्रिया एहि तारीखसँ पहिने भारतीय चुनाव आयोग (ईसीआई) केँ पूरा करय पड़त। संभावना अछि जे अक्टूबर वा नवंबर 2025 मे चुनाव होएत। चुनाव दू-तीन चरणमे भऽ सकैत अछि। निर्वाचन आयोग एखन धरि आधिकारिक तौर पर तारीखक घोषणा नहि कयलक अछि। उम्मीद अछि जे दीपावली आ छठि सन पावनिकेँ ध्यानमे राखि तारीख तय कएल जाएत।
