महाराष्ट्र विधान परिषदक परिणाम घोषित भेल। ११ सीटमेसँ ११ सीटपर परिणाम घोषित कयल गेल अछि, जाहिमे सँ एनडीए ९ सीट जीतल अछि, जखन कि ‘महाराष्ट्र विकास अघाड़ी’ (एमवीए) २टा सीट जीतल अछि। कांग्रेसक उम्मीदवार प्रज्ञा राजीव सातव आ उद्धव ठाकरेक उम्मीदवार मिलिंग नार्वेकर एहि दुनू सीट पर जीति गेलाह। एनडीएक ९ उम्मीदवार जीत दर्ज कयने छथि, जखन कि भाजपा ५ मेसँ चारि सीट जीतल अछि। महाराष्ट्रक उपमुख्यमंत्री अजित पवार कहलनि, “पांच विधायक हमरा समर्थन कयलनि, हम हुनका सबकेँ धन्यवाद दैत छी। जखन चुनाव होइत अछि तखन आरोप लगाओल जाइत अछि मुदा हम एहि बारेमे नहिं सोचैत छी। महायुतिक विधानसभामे सेहो वैह सफलता भेटबाक चाही।
भाजपा, एकनाथ शिंदेक शिवसेना आ अजित पवारक एनसीपीक महायुति गठबन्धन आम चुनावमे निराशाजनक परिणामक बाद वापसी कयलक आ विधान परिषदमे भारी जीत दर्ज कयलक। भाजपाक तीनटा नेता पंकजा मुंडे, परिणय फुके आ योगेश टिलेकर २६-२६ मत प्राप्त कऽ जीतक दावा कयलनि। अजित पवारक पार्टीक दूटा उम्मीदवार राजेश विटेकर आ शिवाजीराव गर्जेकेँ सेहो विजेता घोषित कयल गेल, जखन कि शिंदे सेनाक भावना गवली सेहो जीति गेलीह। कांग्रेस, शिवसेना आ एनसीपी गुटक विपक्षी महा विकास अघाड़ी (एमवीए) अपन तीनटा उम्मीदवार उतारने छल। ११ सीटक लेल १२ गोट उम्मीदवार चुनाव लड़ि रहल छलाह। चुनावक दौरान खरीद-फरोख्तक भय छल, जाहिसँ रिजाॅर्ट राजनीतिक युग शुरू भेल, तहियासँ आब भारतीय चुनावी परिदृश्यक एकटा मानक विशेषता बनि गेल अछि।
