बिहारमे भाजपा १७ सीट पर चुनाव लड़ि सकैत अछि आ जेडीयू १६ सीट पर अपन उम्मीदवार ठाढ़ कऽ सकैत अछि। उपेन्द्र कुशवाहा आ माँझीक पार्टीकेँ एक-एक सीट भेटि सकैत अछि।
लोकसभा चुनावसँ पहिने भारतीय जनता पार्टी अपन सहयोगी दलकेँ मनयबामे लागल अछि। भाजपा नहिं चाहैत अछि जे चुनावसँ पहिने ओकर कोनो सहयोगी दल अलग भऽ जाय, जकर सामना हुनका आम चुनावमे करय पड़ैत अछि। एखन एहि क्रममे मिशन बिहार चलि रहल अछि। एहि क्रममे चिराग पासवानसँ पहिने मनमुटाव दुर कयल गेल अछि। कहल जा रहल अछि जे ओ सभ आश्वस्त भऽ गेल छथि आ सीट बंटवारा पर बात अंतिम चरणमे पहुँचि गेल अछि। सूत्रक कहब अछि जे वैशाली, समस्तीपुर आ हाजीपुर सीट चिराग पासवानक पार्टीक हिस्सामे आयल अछि। चिराग पासवान स्वयं हाजीपुरसँ चुनाव लड़ताह।
आब अगिला बारी चिरागक काका आ केन्द्रीय मंत्री पशुपति पारसक अछि। भाजपा हुनक पार्टी लोक जनशक्ति पार्टीक नेता सभक संग बातचीतक काज मंगल पाण्डेयकेँ सौंपलक अछि। एकर संगहि पारस गुट पशुपति पारसकेँ पार्टीक केन्द्रीय संसदीय बोर्डक बैसारमे निर्णय लेबाक लेल अधिकृत कयलक अछि। बैसारमे ई निर्णय लेल गेल जे भाजपा वा प्रधानमन्त्रीक जे निर्णय होयत पशुपति पारसक पार्टीकेँ स्वीकार्य होयत। पशुपति पारस एक-दू दिनमे भाजपा प्रमुख जेपी नड्डासँ सेहो भेंट करताह।
एहिसँ पहिने भाजपा प्रमुख जेपी नड्डाक सङ्ग बैसारक बाद चिराग पासवान बुधदिन कहलनि जे हुनकर पार्टी लोकसभा चुनावक लेल भारतीय जनता पार्टी (भाजपा)क सङ्ग सीट बंटवाराक फार्मूलाकेँ अंतिम रूप देलक अछि। पासवान भाजपाक राष्ट्रीय अध्यक्ष जेपी नड्डासँ भेंटक बाद ई घोषणा कयलनि। संवाददाता सभसँ बातचीत करैत ओ कहलनि, “हमर सभ चिन्ताक समाधान भाजपा द्वारा कयल गेल अछि। हम संतुष्ट छी। ओ कहलनि जे बिहारमे एनडीए घटक दलक बीच सीटक बंटवाराकेँ अंतिम रूप देल गेल अछि आ जल्दिये एकर औपचारिक घोषणा कयल जायत।”
बिहार भाजपा प्रमुख आ उपमुख्यमंत्री सम्राट चौधरी बृहस्पति दिन बिहारक मुख्यमंत्री नीतीश कुमारसँ पटना स्थित हुनक निवास पर भेंट कयलनि।
कहल जा रहल अछि जे जीतन राम मांझी कैबिनेटमे एकटा आर स्थान चाहि रहल छथि, जकर बारेमे ओ पहिनहिं बात कऽ चुकल छथि।
मानल जा रहल अछि जे भाजपा प्रदेश अध्यक्ष एहि मामला पर माँझीसँ भेंट करबाक लेल पहुँचलाह। मांझीसँ भेंट केलाक बाद संवाददाता सबसँ बातचीतमे भाजपा प्रदेश अध्यक्ष सम्राट चौधरी कहलनि जे लोकसभा चुनावमे ४० सीट जीतबा लेल रुपरेखा बनायल जा रहल अछि, एकर तैयारी कयल जा रहल अछि।
मंत्रिमण्डल विस्तारक विषयमे पूछल गेल एकटा प्रश्नक उत्तरमे ओ कहलनि जे ई मुख्यमंत्रीक विशेषाधिकार अछि, हुनका निर्णय करय केर अछि। माँझीक अप्रसन्नताक विषयमे ओ कहलनि जे हुनक समर्थन सदैव रहल अछि आ ई पर्याप्त अछि।
उल्लेखनीय अछि जे नीतीश कैबिनेट विस्तारक चर्चा जोर-शोरसँ चलि रहल अछि। मानल जा रहल अछि जे मुख्यमंत्री नीतीश कुमार जल्दिये अपन मंत्रिमंडलक विस्तार करय जा रहल छथि।
