केंद्रीय मंत्री जीतन राम मांझी अमित शाहसँ दावा केलाह जे 2025 केर चुनावमे बिहारमे एनडीए केर सरकार बनत। केंद्रीय मंत्री जीतन राम मांझी गृह मंत्री अमित शाहसँ भेट कएलनि अछि। भेटक दौरान जे बात भेल से केंद्रीय मंत्री मीडियाकेँ जनतब देलनि अछि।
सोमकेँ पत्रकार सभसँ बातचीतमे जीतन राम मांझी कहलनि, “अमित शाहजी सँ जखनि मंत्रिमंडल बनल अछि तकर बाद ई पहिल भेंट छल। एहि तरहक मीटिंगमे आ संसदमे बात होइत रहैत छल। मुदा औपचारिक रूपसँ घर पर जा कय नहि भेंट भेल छल। भेंटक समय देल गेल छल। आजुक (सोम) समय फिक्स कएल गेल छल।
केंद्रीय मंत्री जीतन राम मांझी कहलनि, “मंत्रिमंडलमे हमरो शामिल करबाक लेल हम आभार ज्ञापित कयलौंह। बिहारमे की हाल चाल चलि रहल अछि ताहि पर चर्चा भेल। तँ हम कहलियैन जे बिहारमे जे किछु होय एनडीएक सरकार बनत। चिंता करबाक जरूरत नहिं अछि।”
एकटा सवालक जवाबमे केंद्रीय मंत्री पत्रकार सभसँ कहला, “अपने लोकनि बेर-बेर सीट लेल बात कय रहल छी, हुनका (अमित शाह) संग सीट लेल कोनो बात नहिं भेल। बात होइत तँ हम बता सकैत छलौंह। संजय जायसवालसँ पाँच दिन छः दिन पहिने बात भेल अछि जे जूनक अंतमे वा जुलाईमे हमरा लोकनि एनडीएक लोक सभ बैसय जा रहल छी आ बिहारमे सीटक बंटवाराक संबंधमे बात होयत। एखनि ताहि लेल गृह मंत्रीसँ सीट बंटवारा पर कोनो बात नहिं भेल अछि।”
जनतब जे बिहारमे एहि वर्ष (2025) विधानसभाक चुनाव अछि। एक दिसि इंडिया गठबन्धनमे शामिल दल सभक बैठक भ’ रहल अछि तँ दोसर दिस एनडीएमे शामिल पार्टी सभ अधिकसँ अधिक सीट पर लड़बाक लेल दावा ठोकि रहल अछि। केंद्रीय मंत्री जीतन राम मांझी पिछला महिना (मार्च) मे एकटा कार्यक्रममे कहलनि जे हुनक पार्टीकेँ एनडीएमे कमसँ कम 40 सीट मिलबाक चाही। ओ गया’क शेरघाटीमें गरीब चेतना सम्मेलनकेँ संबोधित कय रहल छलाह। ओ शेरघाटी सीट पर सेहो दावा ठोकने छथि।
