संजय झा काल्हि पटना एयरपोर्ट पर कहलनि जे सब किछु परफेक्ट अछि। जहिना हम सब मिलिकय लोकसभा चुनाव लड़लहुं तहिना पूरा एनडीए सभ 243 विधानसभा सीट पर एक संग लड़त।
एहि साल चुनावकेँ लऽ कऽ बिहारमे राजनीतिक उत्साह बेसी अछि। सब दल एक दोसरसँ आगू बढ़बाक होड़मे अछि। संगहि सत्ताधारी दल आ विपक्ष सेहो अपराध आ कानून व्यवस्था पर एक दोसरापर हमला कय रहल अछि। एहि बीच केंद्रीय मंत्री चिराग पासवानक सबटा 243 सीट पर चुनाव लड़बाक बयान एनडीएमे हलचल मचा देलक। संजय झा सेहो एहि संबंधमे एकटा पैघ बयान देलनि, हुनकर अनुसार चिराग पासवान कहलनि अछि जे एनडीए 243 सीट पर लड़त। गठबंधन पूर्णतः मजबूत अछि।
आगामी बिहार विधानसभा चुनाव पर जदयू सांसद संजय झा कहलनि जे, सब किछु परफेक्ट अछि, जहिना हम सब मिलिकय लोकसभा चुनाव लड़लहुं तहिना पूरा एनडीए सब 243 विधानसभा सीट पर एक संग लड़त।
दोसर दिसि जदयूक राज्यसभा सांसद संजय झा राजद सुप्रीमो लालू प्रसादकेँ पद पर हमला करैत कहलनि जे ओ अपन समय बिसरि गेल छथि, सभ अपराधी ओतहि भेंटत।
झा कहलनि जे, “लालू जी कतयसँ आंकड़ा लऽ कय तरह-तरह केर बात कहि रहल छथि, मुदा बिहारक जनता किछु नहि बिसरल अछि। पहिने अपहरण कोना होइत छल, कोना सब उद्योगपति एतयसँ भागि गेल छल। अपन समयमे कोना सब डाक्टर, सब बुद्धिजीवी एतयसँ पलायन कय गेल छल। नीतीश कुमार 20 सालमे कानून केर राज स्थापित कय लेने छथि, की कियो ई कहि सकैत अछि जे ककरो राजनीतिक संरक्षण अछि।”
जनतब जे लालू प्रसाद यादव एक्स पर एकटा पोस्टमे लिखने छथि जे नीतीश केर बताबय केर चाही जे सांझक 5 बजेसँ पहिने घरमे घुसि कय कतेक हत्या भऽ रहल अछि ? की नीतीशकेँ पता छै, चिन्है छै आर समझै छै कि सरकारी आंकड़ाक अनुसार हुनक शासनक दौरान 65 हजार हत्या भऽ चुकलऽ अछि। नीतीश-भाजपा कानून व्यवस्थाकेँ तँ नष्ट कय देलक अछि, ओकर अंतिम संस्कार सेहो कय देलक अछि। बिहारमे एहेन भ्रष्ट, लापरवाह आ आलसी पुलिस कहियो नहि रहल।
ऑपरेशन सिंदूरक तहत प्रतिनिधिक रूपमे विदेश जाए वाला सांसद प्रधानमंत्री नरेंद्र मोदीसँ भेंट करताह, संजय झा मंगलदिन ओही लेल दिल्ली विदा भेलाह। एहि दौरान पटना एयरपोर्ट पर पत्रकार सबसँ गप करैत ओ कहलनि जे पहलगाममे भेल घटनाक बारेमे कहबा लेल हम सब अलग-अलग देशमे गेल छलहुं। हम पांच देश गेलहुं, जे प्रतिनिधिमंडलक नेतृत्व हम कय रहल छलहुं ओहिमे जापान, दक्षिण कोरिया, सिंगापुर, इंडोनेशिया आ मलेशिया शामिल छल। प्रधानमंत्री जी हमरा फोन कयने छथि जे ओहि सब ठामक फीडबैक लेब, ताहि लेल हम ओतय जा रहल छी, हम सब पीएम मोदीसँ साझा करब जे ओतय हमर सबहक अनुभव की रहल अछि।
