बिहार आ आपराधिक घटना दिन प्रतिदिन पर्यायवाची बनि रहल अछि। नवादा जिलाक हिसुआ थाना क्षेत्रसँ एकटा मामिला सामने आयल अछि। दरबारी चौक स्थित दरबारी भवनमे रविदिन एकटा सनसनीखेज घटना घटल, जतय छहटा हथियारबंद अपराधी एकटा व्यवसायी आ हुनक भाई पर गोली चला देलक। एहि हमलामे दुनू भाइ बाल बाल बचि गेलाह। ई पूरा घटना पासक सीसीटीवी कैमरामे रिकॉर्ड भऽ गेल अछि।
पीड़ित नीरज प्रकाश कहलनि जे, दूटा बाइक पर सवार छहटा युवक स्विच लेबाक बहाने दोकानमे घुसल। संदिग्ध व्यवहारक कारण जखनि दोकान बंद होयबाक बात लेल कहल गेल तँ विवाद शुरू भऽ गेल। थोड़ेक कालमे दूटा युवक पिस्तौल निकालि फायरिंग शुरू कय देलक। सौभाग्यवश गोली नहि लागल मुदा झगड़ामे ओ कनेक घायल भऽ गेलाह। दोकानदार हिम्मत देखौलक आ एकटा हमलावरकेँ पकड़बाक प्रयास कयलक, मुदा बाकी युवक ओकरा दिसि पिस्तौल देखा कय भागि गेल।
सूचना भेटला पर हिसुआ थानाक पुलिस तुरंत मौका पर पहुंचल आ जांच शुरू कय देलक। पुलिस मौकासँ दूटा खाली कारतूस, एकटा जिन्दा कारतूस आ एकटा हेलमेट बरामद कयलक अछि। प्रारंभिक जांचमे साफ भऽ गेल अछि जे ई हमला डकैतीक इरादासँ कएल गेल।
पुलिस आब सीसीटीवी फुटेजक आधार पर आरोपीक पहिचान कय गिरफ्तार करय केर कोशिशमे अछि। पीड़ितक अनुसार, सब हमलावरक उम्र 20 सँ 25 सालक बीच छल आ ओ सब हथियारसँ लैस छल।
