नवी मुम्बई मैथिल ट्रस्टक तत्वावधानमे आगामी १६ मार्च, २०२५ तदनुसार रविकेँ “फागुन सिनेह सांस्कृतिक कार्यक्रम”क आयोजन, बंट्स ऑडिटोरियम, जुईनगरमे होमय जा रहल अछि।
मैपुप्र समदियाकेँ ट्रस्टक राजकुमार झा कहलनि, “कार्यक्रमक विहंगमता केर अनुमान एहि बातसँ लगाओल जा सकैत अछि जे विगत् किछु दशकमे मैथिलक सर्वाधिक लोकप्रिय भेल गीत “संग लेने चलु….” केर सरस-गायिका, संगीतकार आ निर्माता, एक संग कार्यक्रममे उपस्थित भऽ दर्शकवृन्दक समक्ष संगीत-लहड़ीक मनभावक प्रस्तुति द्वारा आलोड़ित व आनंदित करता।”
मैथिलीक रॉकस्टार गायिका मिथिलाक धिया प्रिया मल्लिक केर मनमोहक प्रस्तुतिक संग प्रेम प्रकाश कर्णक मैथिली फोक पर आधुनिक संगीतक फ्यूजन कार्यक्रम मुख्य आकर्षण रहत। पहिल बेर कोनो मंच पर लोकप्रिय मैथिली गीतक आधुनिक मैश-अप होमय जा रहल अछि जे कि नवपीढ़ीक धियापुताकेँ आकर्षित करतनि। मधुर मैथिलीक ‘अलर-बलर फेम’ सुप्रसिद्ध अभिनेत्री रौशनी झा आ फ़िल्म डायरेक्टर विकास झा द्वारा मंच संचालन होयत।
आगू झा आह्वान कयलनि, “अद्भुत कार्यक्रमक प्रत्यक्ष साक्षी बनबाक लेल अपने सम्मानित सुहृदयवरक गरिमामयी उपस्थिति सादर प्रार्थनीय अछि। अतः अपने सभसँ सादर आग्रह जे सपरिवार कार्यक्रममे उपस्थित भऽ मैथिली भाषा, संस्कृति, गीत-संगीत एवम् अपनापनक रंगमे डूबकी अवश्य लगाबी।”
