पुरान संसदक केन्द्रीय कक्षमे एनडीए संसदीय दलक बैसारमे नरेन्द्र मोदीकेँ सभ घटक दलक समर्थनसँ लोकसभाक नेता, भाजपाक नेता आ एनडीए संसदीय दलक नेता चुनल गेल। जेडीयू आ तेदेपा प्रधानमंत्री पदक लेल प्रधानमंत्री नरेन्द्र मोदीक नामक समर्थन कयलक अछि।
एहि अवसर पर पीएम मोदी कहलनि, “जखन ४ जूनकेँ परिणाम आबि रहल छल, हम काजमे व्यस्त छलहुँ। बादमे कॉल आबए लागल। हम ककरो कहलहुँ जे हमरा बताउ जे ईवीएम जीवित अछि वा मरि गेल। ई लोकसभ (विपक्ष) निर्णय लेने छलाह जे भारतक लोकतंत्र आ लोकतांत्रिक प्रक्रियामे विश्वास करब बन्द कऽ देताह। ओ सभ लगातार ईवीएम केर गारि देलनि। हमरा लागल जे ओ सभ ईवीएम केर जनाजा निकालताह। मुदा ४ जूनक साँझ धरि हुनक मुँह पर ताला लागि गेल। ईवीएम हुनका चुप करा देलक। ई भारतक लोकतंत्रक ताकत अछि, एकर निष्पक्षता अछि। हम आशा करैत छी जे हमरा ५ साल धरि ईवीएमक बारेमे सुनबाक अवसर नहिं भेटत। मुदा जखन हम २०२९ मे जाएब तखन शायद ओ सभ फेरसँ ईवीएम केर राग अलापय लगताह। देश हुनका सभकेँ कहियो माफ नहिं करत।”
प्रधानमंत्री नरेन्द्र मोदी कहलनि, “एनडीए सरकार देशकेँ सुशासन देलक अछि आ एक तरहेँ एनडीए सुशासनक पर्याय बनि गेल अछि। गरीबक कल्याण आ सुशासन हमर सबहक केन्द्रमे सर्वोपरि रहल अछि।”
प्रधानमंत्री नरेन्द्र मोदी कहलनि, “हम अहाँ सबके हार्दिक आभार व्यक्त करैत छी, जे संगी सभ विजयी भेल छथि ओ सभ अभिनन्दनक पात्र छथि, हम सौभाग्यशाली छी जे एनडीए संसदीय दलक नेताक रूपमे अहाँ सभ सर्वसम्मतिसँ हमरा चुनलहुँ आ हमरा एकटा नव जिम्मेदारी देलहुँ, जाहि लेल हम अहाँक आभारी छी।”
नरेन्द्र मोदी कहलनि, “हमर सभक बीच विश्वासक सेतु मजबूत अछि, ई अटूट संबंध विश्वासक मजबूत जमीन पर अछि आ ई सबसँ पैघ संपत्ति अछि, ई क्षण हमरा लेल भावुक क्षण सेहो अछि, हम अहाँ सबकेँ जतेक धन्यवाद देब, ओतेक कम होएत।”
प्रधानमंत्री आगू कहलनि, “हिन्दुस्तानक एतेक महान लोकतंत्रक ताकत देखू जे आइ एनडीएकेँ देशक २२ राज्यमे सरकार बना कऽ जनताक सेवा करबाक अवसर देल गेल अछि। हमर गठबंधन वास्तवमे भारतक आत्मा अछि।”
मोदी कहलनि, “जाहि तरहें अहाँ सभ बहुमत दऽ कऽ सरकार चलयबाक सौभाग्य देलहुँ अछि, ई हमर सबहक जिम्मेदारी अछि जे हम सब सर्वसम्मतिसँ निरन्तर प्रयास करब आ देशकेँ आगू बढ़ेबामे कोनो कसरि नहिं छोड़ब। एनडीए केर लगभग 3 दशक बीत गेल अछि। ई ३ दशकक यात्रा बहुत शक्तिक संदेश दैत अछि। हम गर्वसँ कहि सकैत छी जे ई गठबंधन सफलतापूर्वक ३ कार्यकाल पार कऽ चुकल अछि आ गठबंधन चारिम कार्यकालमे प्रवेश कऽ रहल अछि।”
एनडीए संसदीय दलक बैसारमे हम(एस)क संस्थापक जीतन राम माँझी नरेन्द्र मोदीकेँ एनडीए संसदीय दलक नेताक रूपमे मनोनीत करबाक प्रस्तावक समर्थन कयलनि।
टीडीपी प्रमुख एन चंद्रबाबू नायडू एनडीए संसदीय दलक बैसारमे कहलनि, “नरेन्द्र मोदी लग एकटा विजन आ जोश अछि, हुनक क्रियान्वयन उत्कृष्ट अछि। ओ अपन सभ नीतिकेँ सही भावनासँ लागू कए रहल छथि। आइ भारत विकास कए रहल अछि। सही नेता – ओ छथि नरेन्द्र मोदी। भारतक लेल ई एकटा नीक अवसर अछि, जँ अहाँ एखन चुकि गेलहुँ तँ हमसभ सदाक लेल चुकि जाएब।”
लोजपा (रामविलास) प्रमुख चिराग पासवान कहलनि, “रक्षा मंत्री राजनाथ सिंह जे प्रस्ताव देलनि अछि, हम अपन पार्टी लोजपा (रामविलास) केर तरफसँ एनडीए संसदीय दलक नेता पदक लेल नरेंद्र मोदीक नामक समर्थन करैत छी।
एनडीए संसदीय दलक बैसारमे जद(एस)क निर्वाचित सांसद एचडी कुमारस्वामी नरेन्द्र मोदीकेँ एनडीए संसदीय दलक नेताक रूपमे मनोनीत करबाक प्रस्तावक समर्थन कयलनि।
रक्षा मंत्री राजनाथ सिंह एनडीए नेता आ प्रधानमंत्री पद लेल प्रधानमंत्री नरेन्द्र मोदीक नाम प्रस्तावित कयलनि।
