नहिं रहलाह प्रभात क्षा

सीतामढ़ी
*

भाजपाक वरिष्ठ नेता प्रभात झाक दिल्लीमे निधनसँ शोक पसरि गेल अछि। हुनकर अंतिम संस्कार काल्हि अपन गाम सीतामढ़ीक कोरियाहीमे कयल जायत। हुनकर शव शनि दिन भोरमे आबि जाएत। हुनक पत्नी दिल्लीसँ अपन गाम कोरियाही पहुँचि रहल छथि। हुनका दूटा बेटा छनि। दुनू बेटा हुनक शव लऽ कऽ पहिने मध्य प्रदेशक भोपाल जयताह। ओतएसँ हुनकर शव गाम पहुँचत।

भाजपाक पूर्व उपाध्यक्ष प्रभात झाक शुक्रदिन भोरे दिल्लीमे निधन भऽ गेलनि। ओ ६७ वर्षक छलाह। जहिना हुनक निधनक समाचार भेटल, जिला भाजपा नेताक सङ्ग हुनक गाममे शोकक लहर पसरि गेल। हुनक निधनसँ सभगोटे दुखी छथि।
स्वर्गीय झा सीतामढ़ी जिलाक सुरसंड प्रखंडक कोरियाही गामक निवासी छलाह। ओ भाजपाक राष्ट्रीय उपाध्यक्ष रहि चुकल छथि। हुनकर गिनती मध्य प्रदेशमे भाजपाक मजबूत नेतामे होइत छल। ओ मध्य प्रदेश भाजपाक प्रदेश अध्यक्ष सेहो छलाह। संगहि ग्वालियर-चम्बल क्षेत्रमे हुनकालोकनिक मजबूत पकड़ अछि। ओ मध्य प्रदेशसँ दू बेर राज्यसभाक लेल चुनल गेलाह।

जानकारीक अनुसार २९ जूनकेँ न्यूरोलॉजिकल समस्याक कारण हुनका हेलीकॉप्टरसँ मेदांता अस्पताल लऽ जायल गेल, जतय हुनकर इलाज चलि रहल छल।
कोरियाही गामक निवासी मुरली झा कहलनि जे हुनक मृत्युक समाचार सुनि पूरा गाम स्तब्ध अछि। गाममे शोकक लहर अछि। हुनकर अंतिम संस्कार शनि दिन गाममे होयत। एकरा लेल तैयारी चलि रहल अछि। हुनकर शव शनि दिन भोरमे आबि जाएत। हुनक पत्नी दिल्लीसँ अपन गाम कोरियाही पहुँचि रहल छथि। हुनका दूटा बेटा छनि। दुनू बेटा हुनक शव लऽ कऽ पहिने मध्य प्रदेशक भोपाल जायत। ओतएसँ हुनकर शव गाम पहुँचत। ओ बतौलनि जे हुनक अन्तिम संस्कारक लेल गाममे तैयारी कयल जा रहल अछि।

लोकसभा चुनावक दौरान, स्वर्गीय झा सीतामढ़ी आयल छलाह। ओ स्थानीय सांसद देवेश चन्द्र ठाकुरक लेल सेहो प्रचार कयने छलाह। ओ सीतामढ़ीमे केन्द्रीय गृह मंत्री अमित शाहक बैसारमे सेहो मंच साझा कयलनि।

ओ पुनौराधाममे जानकी नवमीक अवसर पर स्वामी रामभद्राचार्यक श्रीराम कथामे सेहो भाग लेलनि। ओहि समय संवाददाता लोकनिसँ गप्प करैत ओ कहने छलाह जे अयोध्या जकाँ सीतामढ़ीमे सेहो माता जानकीक भव्य मंदिर बनत आ ओहिना एकरो विकसित कयल जायत।