केंद्रीय मंत्री गिरिराज सिंह अपन बयानक लेल हरदम चर्चामे रहैत छथि। ओतहि सोमदिन ओ लालू यादव आ तेजस्वी यादव पर पैघ हमला कयलनि।
बिहारमे ‘इंडिया’ आ एनडीए गठबंधनक नेता लोकसभाक चुनाव जीतबाक लेल पूरा ताकत लगा रहल छथि। एहि पर बहुत बयानबाजी सेहो कयल जा रहल अछि आ दावा कयल जा रहल अछि। एम्हर सोमदिन भाजपाक केंद्रीय मंत्री गिरिराज सिंह नेता प्रतिपक्ष तेजस्वी यादव पर पैघ हमला कयलथि। ओ कहलनि जे एहि लहरिमे सब किछु स्पष्ट भऽ जायत। ४ जूनक बाद लालू यादव आ तेजस्वी यादव मस्जिदमे रहताह। ४०० केर पार भऽ चुकल अछि।
प्रधानमंत्री मोदी इशारामे लालू परिवार पर कारवाईक बात कहने छलाह। एहि पर तेजस्वी यादव जवाब दैत कहलनि जे ओ डरैत नहिं छथि। एहि पर प्रतिक्रिया दैत गिरिराज सिंह कहलनि जे लालू यादव डरि गेल छथि आ थाकि गेल छथि। ताहि लेल ओ लोकक बीच एहन बात रखबाक काज करैत छथि। लालू यादवक पूरा कुनबा मात्र मुसलमान-मुसलमान चिचियाईत रहल अछि, मुदा मुसलमान-मुसलमान चिचियेलासँ अहाँक खाता नहिं खुजत।
संगहि राहुल गाँधी पर निशाना साधैत केन्द्रीय मंत्री कहलनि जे ओ अपन धुनमे चलैत छथि। हुनका जे पर्चा भेटैत अछि, ओही पर बजैत छथि। राहुल गाँधीक बिहारक चुनावी दौरा पर ओ कहलनि जे ‘मुस मोटहिएन लोढ़ा होईएन’, आब हुनक आगमनसँ की होएत ? जेना-जेना बिहारमे चुनाव अंतिम चरण दिस बढ़ि रहल अछि, वाकयुद्ध तेज भऽ गेल अछि। दुनू गठबंधनक नेता एक दोसरा पर भयंकर आरोप लगा रहल छथि। एहि दौरान गिरिराज सिंह बहुत आक्रामक छथि। ओ राजद आ कांग्रेस पर जमिकय प्रहार कए रहल छथि आ घेरि रहल छथि।
