केंद्रीय मंत्री राजीव रंजन सिंह उर्फ ललन सिंह सेहो भारतक मजबूत, सफल आ निर्णायक ‘ऑपरेशन सिंदूर’ पर काल्हि विशेष चर्चाक दौरान लोकसभामे अपन बात रखलनि। एहि दौरान ओ विपक्षी दलक आरोपकेँ जवाब देलनि आ केंद्र सरकारक कार्यवाहीक समर्थन कयलनि। कांग्रेस सांसद गौरव गोगोई केर हर सवालक जवाब देलनि आओर हुनक सभ आरोपकेँ खारिज कय देलनि।
पंचायती राज मंत्री राजीव रंजन सिंह उर्फ ललन सिंह कहलनि जे, गौरव गोगोई एकोटा उपयोगी बात नहि कहलनि। सेनाक शौर्य आ साहसक प्रशंसा एक्को बेर नहि कयलनि। अहाँक नजरिमे सेनाक कोनो महत्व नहि अछि। आतंकी घटना आजुक नहि अछि। देशमे 2004 सँ 2014 धरि आतंकवाद खूब फलल-फूलल। आतंककेँ आश्रय देल गेल। 2004 सँ 2014 धरि आतंकी घटनामे 615 लोकक मृत्यु भेल छल। हजारो लोक घायल भेल। अहाँ पूछि रहल छी जे पहलगाममे आतंकी कोना घुसल। 26/11 केँ मुंबई हमलामे आतंकी कतयसँ आयल छल ? ई बात अहाँकेँ कहबाक चाही। अहाँमे नहि आतंकवादसँ लड़बाक हिम्मत छल आ नहि कार्यवाही करबाक हिम्मत। अहाँ तऽ बस मगरमच्छक नोर बहा देलियै।
ओ कहलनि जे कांग्रेस आतंकवादकेँ पनपय देलक। यूपीएमे आतंकवादसँ लड़बाक हिम्मत नहि छल। अहाँ औपचारिकता कयलौह आ मगरमच्छक नोर बहा देलौंह। मुंबई घटनाक मुख्य मास्टरमाइंडकेँ अहां नहिं आनि सकलहुं। भाजपा ओकरा भारत अनलक। भारत पहिल बेर 2016मे आतंकवादक खिलाफ लड़ाई शुरू कयलक। प्रधानमंत्री आतंकवादीकेँ घरमे घुसि कय मारबाक प्रण लेलनि आ काज शुरू कय देलनि। उरी केर बाद हम सब सर्जिकल स्ट्राइक कयलहुँ। पुलवामा हमलाक बाद मोदी सरकार हवाई हमला कयलक। कांग्रेस मोदी जीकेँ पढ़ा रहल अछि। कांग्रेस आतंकवादक खिलाफ कतेक लड़ाई लड़लक ? कांग्रेस कहियो किछु नहि कयलक। देशक एकता आ अखंडतासँ मजाक नहि करू।
ललन सिंह कहलनि जे, यूपीएकेँ कोनो प्रधानमंत्री आतंकवादक उन्मूलनक प्रण नहि लेलक। ई प्रधानमंत्री मोदीक प्रतिज्ञा छल। 22 अप्रैलकेँ पहलगाम हमलाक बाद प्रधानमंत्री मोदी अपन विदेश यात्रा स्थगित कय देश वापिस आबि गेलाह। 24 अप्रैलकेँ पंचायती राज दिवस पर प्रधानमंत्री मोदी बिहारक मधुबनीसँ कहने छलाह जे भारत पाकिस्तानकेँ कल्पनासँ परे जवाब देत। ओ पूरा दुनियाकेँ संदेश देलनि जे हम सभ आतंकवादक सामने झुकयवला नहि छी।
