ऑपरेशन सिंदूर आ भारतक स्टैंडकेँ दुनियाक शक्तिशाली देश सभ धरि पहुँचाबय लेल बनाओल गेल सात डेलीगेशनमेसँ काल्हि एकटा डेलीगेशन दिल्लीसँ रवाना भेल। जेडीयू सांसद संजय झा’क नेतृत्वमे ई प्रतिनिधि मंडल श्री गणेश कयलक। एकर संगहि शिवसेना सांसद श्रीकांत शिंदेक नेतृत्वमे दोसर डेलीगेशन सेहो विश्वक अलग-अलग देशक सफर पर जाय केर तैयारीमे छल।
ऑपरेशन सिंदूरक बारेमे विश्व शक्तिकेँ जनतब देबय आ पाकिस्तानक आतंकवादसँ संबंधक मामिला उजागर करय लेल भारतक वैश्विक पहुँच काल्हिसँ शुरू भऽ रहल अछि। सात प्रतिनिधिमंडलमेसँ दूटा काल्हि अपन-अपन अलॉट कयल गेल देश सभक यात्रा शुरू कयलनि।
ऑपरेशन सिंदूर आ आतंकवादक खिलाफ भारतक विचारधाराकेँ दुनियाकेँ देश सब धरि पहुँचाबय लेल जेडीयू सांसद संजय कुमार झा’क नेतृत्वमे एकटा सर्वदलीय प्रतिनिधिमंडल दिल्ली एयरपोर्टसँ रवाना भेल। एहि डेलीगेशनमे ऑपरेशन सिंदूर आ आतंकवादक खिलाफ भारतक निरंतर लड़ाईकेँ प्रदर्शित करवाक लेल जापान, इंडोनेशिया, मलेशिया, कोरिया गणराज्य आ सिंगापुरक दौरा कयल जायत।
डेलीगेशनमे जदयू सांसद संजय झा समेत राजदूत मोहन कुमार, भाजपा सांसद प्रदान बरुआ, टीएमसी सांसद अभिषेक बनर्जी, भाजपा सांसद बृज लाल, भाजपा सांसद अपराजिता सारंगी, सीपीआई(एम) सांसद जॉन ब्रिटास, भाजपा सांसद डॉ. हेमंग जोशी शामिल छथि।
काल्हि दुटा भारतीय प्रतिनिधिमंडल रवाना भेल। जाहिमे एकटाक नेतृत्व जेडीयूक संजय झा आ दोसरक शिवसेनाक श्रीकांत शिंदे कय रहल छथि।
संजय झा कहलनि जे आतंकवाद पाकिस्तानक सरकारी नीति अछि। हम 40 वर्षसँ एकरा झेलि रहल छी। दुनियाक सबसँ पैघ लोकतंत्र भारत आब पाकिस्तानकेँ बेनकाब करत। दोसर उद्देश्य हुनक परमाणु झांसाकेँ उजागर करनाइ अछि। संगहि, सिंधु जल संधि दुनू देशक बीच मित्रवत् सहयोग पर आधारित छल। दोस्ती कतऽ अछि ? हम भारतीय पक्षकेँ सामने राखब। ओ कहलनि जे दुनियाक कतेको ठाम आतंकवादक कोनो ने कोनो तार पाकिस्तानसँ जुड़ल अछि। ओसामा बिन लादेन कतौह नहि भेटल, ओ पाकिस्तानमे भेटल। देश आतंकवाद पर पनपैत अछि। हमरा एकर पर्दाफाश करबाक आवश्यकता अछि।
दोसर दल शिवसेना सांसद श्रीकांत शिंदेक नेतृत्वमे रवाना होबयवाला छल। ई दल यूएई, डेमोक्रेटिक रिपब्लिक ऑफ कांगो, सिएरा लियोन आ लाइबेरियाक यात्रा करत। एही प्रतिनिधिमंडलमे भाजपा सांसद बांसुरी स्वराज, अतुल गर्ग, मनन कुमार मिश्रा, पूर्व सांसद एसएस अहलूवालिया, इंडियन यूनियन मुस्लिम लीग केर सांसद ईटी मोहम्मद बशीर, बीजेडी सांसद सस्मित पात्रा आ पूर्व राजनयिक सुजान चिनॉय शामिल छथि।
