पिछला किछु समयसँ बिहारक कानून आ प्रशासन व्यवस्था पर बिहार प्रतिपक्षक नेता तेजस्वी यादव लगातार प्रहार करैत आबि रहल छथि, ऑकड़ाक संग क्राइम बुलेटिन जारी करैत छथि। मुदा आब हुनकर आरोप पर बिहार प्रशासन स्वयं सामने आबि ब्योरा दैत आपत्ति जतौलक अछि जे नेता प्रतिपक्ष द्वारा कानून व्यवस्था पर उठाओल गेल आरोपक जाँच करेलाक बाद आरोप आधारहीन पाओल गेल।
एडीजी पंकज कुमार दराद कहलनि कि तेजस्वी यादव अपन एक्स पर जे 117 घटनाक उल्लेख कएने छथि, ताहिमे सँ मात्र 46 घटनाक पहिचान भऽ पाओल अछि।बिहारमे कानून-व्यवस्था केर चाक-चौबंद बनेने राखय लेल कुख्यात आ इनामी अपराधीकेँ खिलाफ पुलिसक एक्शन लगातार जारी अछि। पिछला 40 दिनमे बिहारमे 1 लाखक इनामी समेत 17 नक्सली, 137 इनामी अपराधी आ विभिन्न जिलाक टॉप-10 अपराधी सभक लिस्टमे शामिल 17 कुख्यात अपराधी पकड़ल जा चुकल अछि।
पटना पुलिस मुख्यालय सरदार पटेल भवनक सभागारमे प्रेस वार्ताक दौरान एडीजी (विधि-व्यवस्था) पंकज कुमार दराद कहलनि कि पुलिसक गिरफ्तमे आएल अपराधी आ नक्सलीक लगसँ 1 एके-47, 3 एसएलआर, 4 रेगुलर रायफल, 986 कारतूस समेत अन्य चीजसभ बरामद भेल अछि।
एडीजी आगा कहलनि कि पिछला 40 दिनमे नक्सली आ अपराधी सभ संग 4 बेर मुठभेड़ भेल अछि। गयाक इमामगन्जमे 4 अप्रैलकेँ जमुईक कटोरिया थाना क्षेत्रमे भेल छापामारीमे 4 नक्सली गिरफ्तार कएल गेल छल। हुनका सभक लगसँ 4 रेगुलर रायफल आ 527 कारतूस बरामद कएल गेल छल। एसटीएफ रोहतासक उदवंतनगरमे छापामारीक दौरान 1 एके-47 आ 43 गोली बरामद कएल गेल। ओ कहला जे एके-47 बरामदगी मामिला केर जाँच कएल जायत। एकर लिंक कहां तक जुड़ल अछि, एकर पूरा गंभीरतासँ तफ्तीश होयत।
एडीजी दराद कहला जे हालमे नेता प्रतिपक्ष बिहारमे भेल दर्जन भरि घटनाक जिक्र कऽ कानून-व्यवस्था पर प्रश्न उठौने रहथि। एहि सभ घटनाक मुख्यालयक स्तरसँ जाँच कराओल गेल, त’ महज 46 घटनाक पहिचान भेल। बाँचल घटनाक बारेमे किछु सूचना नहिँ भेटल अछि। ओ अपन एक्स पोस्ट पर एहि घटनासँ संबंधित नहि त’ कोनो स्थानक उल्लेख कएल अछि आ नहिं एकर संलग्न अन्य किछु विवरण देल अछि।
ओ कहलाह जे नेता प्रतिपक्ष तेजस्वी यादव अपन एक्स पोस्ट पर 117 घटनाक उल्लेख कएलथि। एहिमे अधिकांश घटनाक बारेमे कोनो सटीक जानकारी नहि अछि।
जाहि 46 घटनाक्रमक जिक्र भेल अछि, ताहिमे अधिकांश आपसी रंजिश, छोट-छोट लेन-देन वा विवाद, प्रेम प्रसंगसहित ऐहन अन्य घटना शामिल छैक। जनवरीसँ मार्च धरि हत्याक मामिलामे 1632 आरोपीक गिरफ्तारी भ’ चुकल अछि। पुलिस पर हमलाक मामिलामे 947, लूटक 697 आ डकैतीक 221 आरोपीकेँ गिरफ्तार कयल गेल अछि। कहलनि जे संज्ञेय अपराधक दर बिहारमे 277 अछि, जे राष्ट्रीय दर 467 सँ काफी कम अछि। देशमे बिहारक स्थान 19म अछि। एडीजी पुलिस आ एसटीएफ केर स्तरसँ विगत तीन मासक दौरान कयल गेल प्रमुख कारवाईक जिक्र कयलाह। एहिमे गिरफ्तार कयल गेल अपराधीक बारेमे जानकारी देल गेल।
