प्रधानमंत्री नरेन्द्र मोदी शुक्रदिन महाराष्ट्रक नंदुरबारमे विपक्षी महा विकास अघाड़ी गठबन्धन पर तीखा हमला कयलनि। ओ संजय राउत द्वारा देल गेल आपत्तिजनक बयानक सेहो उल्लेख कयलनि। रैलीकेँ संबोधित करैत प्रधानमंत्री कहलनि कि शिवसेना वालाकेँ गरीब लोकक प्रति कतेक घृणा अछि, ओ काल्हिये बतौलनि अछि। शिवसेनाक ई नकली लोक हमरा जिन्दा दफनाबय केर बात कए रहल छथि। एक दिस कांग्रेस अछि, जे कहैत अछि- मोदी अहाँक कब्र खोदि देब, दोसर दिस ई नकली शिवसेना हमरा जिन्दा दफनाबय केर बात करैत अछि। हमरा गारि दैत काल सेहो ई लोक तुष्टीकरणक पूरा ध्यान रखैत छथि।
प्रधानमंत्री महा विकास अघाड़ीकेँ घेरैत आगू कहलनि, “ई भाषा तुष्टीकरणक लेल बाजल जा रहल अछि। ई सपना देखि रहल छथि जे ओ मोदीकेँ जमीनमे गाड़ि देताह। हुनकर राजनीतिक जमीन खिसकि चुकल अछि। हिनका सभकेँ पता नहिं जे देशक माता-बहिन मोदीक रक्षा करत।” प्रधानमंत्री आगू कहलनि, “माता-बहिन मोदीक रक्षक छथि। ई मातृ शक्ति हमर रक्षा कवच अछि। हमरा उपर मातृशक्तिक एतेक आशीर्वाद अछि जे ई लोक सभ मोदीकेँ मृत्युक बादो जमीनमे दफन नहि कऽ सकत, जीवित रहैत तऽ बाते छोड़ू।”
संजय राउतक विवादित बोल।
अहमदनगरमे एकटा जनसभाकेँ सम्बोधित करैत संजय राउत कहने छलाह जे छत्रपति शिवाजी महाराजक जन्म महाराष्ट्रमे भेल छल आ औरंगजेबक जन्म गुजरातमे भेल छल। प्रधानमंत्री आ गृहमंत्रीकेँ उद्योगपति बताबैत राउत कहलनि जे नरेन्द्र मोदी आ अमित शाहक जन्म सेहो गुजरातमे भेल अछि। शिवसेना-यूबीटी नेता कहलनि, “छत्रपति शिवाजी महाराजक जन्म महाराष्ट्रमे भेल छल, तेँ महाराष्ट्रक अपन इतिहास अछि। एहि औरंगजेबक जन्म गुजरातमे भेल छल, इतिहास देखू। ओकर जन्म दाहोद गाममे भेल छल। ध्यान राखू जे एक बेर हम औरंगजेबकेँ महाराष्ट्रसँ भगा देलहुँ। २७ साल धरि औरंगजेब महाराष्ट्रकेँ जीतबाक लेल लड़ल। अंतमे हम ओही औरंगजेबकेँ गाड़ि कए ओकर कब्र बनौलहुं।”
