केन्द्रीय गृह मंत्री अमित शाह शुक्रदिन स्पष्ट कयलनि जे नरेन्द्र मोदी सरकार आरक्षण नीतिकेँ कहियो नहिं छूअत आ ने आन केकरो एहन करबाक अनुमति देत। शाह इहो कहलनी कि सरकार देशसँ नक्सलवाद केर उन्मूलनक पूरा कोशिश करत।
शाह कहलनि “हम आरक्षणक नीतिकेँ कहियो स्पर्श नहिं करब आ ने कोनो आनकेँ एहन करय देब।” गृह मंत्री एहि अटकलकेँ सेहो खारिज कऽ देलनि जे सरकार संविधानमे संशोधन करबाक योजना बना रहल अछि। “जँ हमरा संविधान बदलय केर रहैत तऽ हम एकरा पहिने कऽ सकैत छलहुं।”
ओ कहलनि कि ‘सेक्युलर’ शब्द हटाबय केर हमरा कोनो जरूरत नहिं अछि। एहि देशकेँ पंथनिरपेक्ष बनयबाक सबसँ पैघ आग्रह भाजपाक अछि, ताहि लेल हम यूसीसी आनि रहल छी। ओ सभ कहि रहल छथि जे देश शरियाक आधार पर चलबाक चाही, हुनका सेक्युलर हेबाक जरूरत अछि, हमरा नहिं।
अमित शाह कहलनि जे हमर संविधानक निर्माता लोकनि स्वीकार कयने छलाह जे देशमे समान नागरिक संहिता (यूसीसी) होयबाक चाही, मुदा ओ उचित समय नहिं छल, अतः अनुच्छेद ४४ मे संविधान निर्मातासभ विधानमंडल आ संसदकेँ कहलनि अछि जे देशक सभ नागरिकक लेल उचित समय पर यूसीसी लागू करबाक देश प्रयास करत। कांग्रेस आइ वोट बैंकक कारण कहि रहल अछि जे यूसीसी नहिं हेबाक चाही। हम सभ भारतीय जनसंघक स्थापनाक समयसँ कहि रहल छी जे देशमे यूसीसी होयबाक चाही आ आब पूरा भारतमे यूसीसी होयबाक समय आबि गेल अछि।
शाह कहलनि जे भाजपाक नेतृत्ववला एनडीए सरकार संसदमे अपन बहुमतक दुरुपयोग नहिं कयलक अछि। “हम १० सालसँ प्राप्त बहुमतक दुरुपयोग नहिं कयलहुं। बहुमतक दुरुपयोग करय केर आदति कांग्रेसक अछि, हमर नहिं।”
शाह कहलनि जे भाजपाक प्रतिबद्धतामे कोनो बदलाव नहिं भेल अछि आ एहि बातपर प्रकाश देलनि जे महिला आरक्षण अधिनियम आ नागरिकता (संशोधन) अधिनियम (सीएए) मोदी सरकार द्वारा आनल गेल छल।
ओ कहलनि जे विपक्षी कांग्रेसक लग भाजपाक नेतृत्ववला सरकारपर हमला करबाक कोनो मुद्दा नहि अछि। “हम देश भरिमे यात्रा कयने छी, सभ गोटे तेसर बेर पीएम मोदीकेँ वोट देबाक प्रतीक्षा कऽ रहल छथि। बृहस्पति कऽ गांधी नगरमे हमर रोड शो ओहि इलाकामे छल जतए हम एकटा आम कार्यकर्ताक रुपमे पार्टीक पोस्टर सटने छलौंह।”
अमित कहलनि जे ३० सालसँ गांधीनगरक लोक हुनका वोट दैत आबि रहल छथि – पहिने विधायक आ फेर सांसदक रूपमे – आ ई हुनका लेल एकटा भावनात्मक यात्रा छल। शाह कहलनि जे भाजपा एहि बेर लोकसभा चुनावमे दक्षिण भारतमे अपन सर्वश्रेष्ठ प्रदर्शन दर्ज करत। “दक्षिण प्रधानमंत्रीक लोकप्रियताकेँ सीटमे बदलबाक लेल तैयार अछि।”
शाह कहलनि जे मोदी सरकार बेर-बेर नक्सलीसभसँ हिंसा छोड़बाक लेल कहलक अछि। “९० दिनमे छत्तीसगढ़क भाजपा सरकार नक्सलवादसँ निपटबाक लेल पैघ स्तरपर काज कयलक। हम भारतसँ माओवादकेँ खतम करब। ओ इहो दावा कयलनि जे छत्तीसगढ़मे कांग्रेसक शासनकालमे नक्सलसभ पर कोनो नियंत्रण नहि छल।
