पहलगामक हमलाकेँ लऽ कऽ देशमे राजनीतिक भूचाल आयल अछि। दोषारोपण खेल जारी अछि। असमक धिंगक विधायक हाजी अमीनुल इस्लाम राजनीतिक एहि बवंडरक चपेटमे आबि गेल छथि। २३ अप्रैलकेँ हुनक वक्तव्य राज्यमे मात्र राजनीतिक हलचल उत्पन्न नहि कयलक, बल्कि केन्द्र आ राज्य सरकारकेँ कठोर कारवाई करबाक लेल सेहो विवश कऽ देलक। एहि बयानक बाद असम पुलिस विधायक हाजी अमीनुल इस्लामकेँ गिरफ्तार कयलक अछि।
पुलवामा हमला जकाँ अमीनुल इस्लाम सेहो पहलगामक घटनाकेँ “सरकारी षड्यंत्र” बतौलनि आ कहलनि जे केन्द्र सरकार बेर-बेर एहेन घटना कय हिन्दू-मुस्लिम ध्रुवीकरणक राजनीति करैत अछि। नगाँवमे प्रचारक क्रममे अपन २ मिनटक ४५ सेकेण्डक वक्तव्यमे ओ कहलनि: “जँ केन्द्र सरकार पहलगाम मामिलाक निष्पक्ष जाँच नहि करैत अछि तँ हमसभ मानब जे ई मोदी-शाहक षड्यंत्र छल।” हुनक बयानक बाद असम पुलिस २४ अप्रैलकेँ हुनका राजद्रोह आ साम्प्रदायिक सौहार्द बिगाड़बाक आरोपमे गिरफ्तार कयलक।
भाजपा एहि बयानकेँ “राष्ट्रविरोधी” बतबैत तत्काल कारवाईक माँग कयलक, जखन कि अमीनुलक पार्टी एआईयूडीएफ बयानसँ दूरी बना लेलक। पार्टी कहलक जे ई अमीनुलक व्यक्तिगत विचार छल, पार्टीक नहि।
एहि मामिलामे अमीनुल इस्लाम एकमात्र एहेन नहि अछि जकरा गिरफ्तार कयल गेल अछि। पहलगाम हमलाक बाद असममे एखन धरि १६ लोककेँ “भड़काउ आ देशद्रोही बयान” देबाक आरोपमे गिरफ्तार कयल जा चुकल अछि। ई गिरफ्तारी सोशल मीडिया पर “भड़काउ पोस्ट” आ वीडियो बयानक आधार पर कयल गेल अछि।
