एहि अवसर पर मणिकांत झा, अजय नाथ झा शास्त्री समेत अनेकक उपस्थिति
मधुबनी जिलान्तर्गत हरलाखी थाना क्षेत्रक हिसार पोस्टक हरसुवार गामक रघुनंदन झा’क पौत्र आ पवन झा’क सुपुत्र मिथिलाक्षर साक्षरता अभियानी साकेत झा शुक्रकेँ हिसार गामक स्व. गोपी कान्त ठाकुरक पौत्री आ राघवेन्द्र ठाकुरक सुपुत्री सोनमकेँ संग दाम्पत्य जीवनमे प्रवेश कयलनि। एहि अवसर पर भव्य परिणोत्सवक आयोजन भेल जाहिमे वराती-सराती पक्षक अनेक लोकक उपस्थिति एवं परस्पर स्नेह-मिलन मनभावन छल। सुसज्जित पांडालक सुसज्जित मंच आ सुन्दर साज-बाजक कार्यक्रम एवं चित्ताकर्षक जयमालक कार्यक्रम सभकेँ हर्षित एवं आनंदित कयलक।
चर्चित सामाजिक व्यक्तित्व गीतकार-साहित्यकार- आकाशवाणी दरभंगाक उदघोषक एवं निर्वाचन आयोग दरभंगाक आयकाॅन मणिकांत झा एवं अजय नाथ झा शास्त्रीक उपस्थिति उल्लेखनीय रहल।
अभियानी जगत रंजन झा, कुन्दन आनंद झा समेत दुनू पक्षक संबधी सहित पारिवारिक उपस्थिति पावन विवाहक साक्षी बनल। उपस्थित पुरूष जन पारंपरिक परिधानमे पाग-दोपटाक संग देखल गेलाह। पारंपरिक विधि-व्यवाहरक संग विवाह संपन्न भेल। नव दंपतिकेँ हार्दिक अभिनन्दनक संग शुभकाना एवं आशीर्वाद देल गेल। पुनः-पुन: अभिनंदन एवं हार्दिक शुभकामना।
