शनि, १९ जुलाई २०२५ केँ पटनाक बिहार आर्ट गैलरीक प्रांगणमे विचार गोष्ठीक आयोजन
*
पटना समदिया
*
पटनामे काल्हि १९ जुलाई, शनिकेँ बिहार आर्ट गैलरीक उग्राद्या रिसर्च एंड डेवलपमेंट सेंटर पर जे कि अमरनाथ मंदिर रोड, जयप्रकाश नगर, पटना-२६ मे अवस्थित अछि, ‘मैथिल पुनर्जागरण प्रकाश फोरम’क आयोजकत्व आ UR&DC एवं उग्राद्याक प्रायोजकत्वमे तथा वरिष्ठ संरक्षक डाॅ विनय कर्णक संयोजकत्वमे ‘मिथलाक्षर साक्षरता अभियान’क एकटा विचार-गोष्ठी संध्याकाल भेल। पटना एवं आसपासक अभियानीगणक जुटान रहनि, अभियानमे गति देबय हेतु एवं फोरमक उद्देश्य पूर्ति हेतु अनेक विंदु सभ पर चर्चा भेल। ‘मिथिलाक्षर साक्षरता अभियान’क ‘पटना इकाई’क गठन भेल। मिथिलाक्षर साक्षरता अभियानक आगुक सम्मान समारोह लेल चर्चा भेल। मिथिलाक्षर साक्षरता अभियानक १६७म बैचक अभियानी राहुल कर्ण जे ६७वीं बीपीएससी परीक्षा उत्तीर्ण कय BDO केर रुपमे पदासीन छथि, तिनका अभिनंदन कयल गेल।
मिथिलाक्षर साक्षरता अभियानक संस्थापक अजय नाथ झा शास्त्री, संयोजक डाॅ विनय कर्ण, संरक्षक एसडीओ राहुल कर्ण समेत अनेक ‘मिथिलाक्षर प्रवीण’ अभियानी द्वारा दीप प्रज्ज्वलित कए विचार गोष्ठीक शुभारंभ भेल। पुनः डाॅ विनय कर्ण द्वारा स्वागत संभाषण एवं अभियानी राहुल कर्ण जे बीपीएससी परीक्षा उत्तीर्ण कऽ एसडीओ पद पर पदासीन भेलथि अछि, तिनका पाग-दोपटा पुष्प माल्य आदिसँ संस्थापक अजय नाथ झा शास्त्री, संयोजक डाॅ विनय कर्ण एवं उपस्थित गणमान्य लोक तथा अभियानीगण द्वारा सत्कारपूर्वक अभिनंदन कयल गेल।
अभिनंदन स्वीकार करैत राहुल कर्ण अभियानक प्रति कृतज्ञता ज्ञापित करैत, अपन अभियान यात्राक संस्मरण व्यक्त कयलनि एवं अभियानमे गति देबाक लेल मार्गदर्शन कयलनि संगहि पुर्ववत् अपन अभियानमे संलग्नता जारी राखय केर यथाशक्ति आश्वासन देलनि।
संयोजक डाॅ विनय कर्ण अपन ओजस्वी वक्तव्यमे मिथिला-मैथिलीक लेल मिथिलाक्षरक पुनर्जागरण सहित फोरमक विभिन्न प्रकल्प भाषा, लिपि, संस्कृति, शिक्षा, मैथिली अखबार ‘मैथिल पुनर्जागरण प्रकाश’ आदिक महत्ता एवं एकर गतिशीलता जोरदार ढ़ंगसँ जारी राखय लेल अभियानीगणकेँ उत्साहित कयलनि आ कहलनि जिनकर जेहेन सक्षमता अछि ताहि अनुरुप अपन योगदान रुचिपूर्वक देल जा सकैत छैक, बिना आर्थिक सहयोगक सेहो बहुत प्रकारसँ सहयोग कयल जा सकैछ जँ रुचि होए तऽ। यद्यपि गतिक लेल अर्थक आवश्यकता होइते छैक, मुदा ताहि लेल सक्षम लोककेँ प्रेरित करब, फोरमक काजक महत्ता बताबैत एकर उपयोगिता बतायब आ कयल गेल काज जाहिमे मिथिलाक्षरक उदय आ मैथिली अखबार सन असंभव काजक उपलब्धि बताबैत सहयोगक लेल अपन दावेदारी बतायब आदि रुपेँ प्रेरणा जगायब सेहो बहुत लाभदायक सिद्ध होयत।
संस्थापक अजय नाथ झा शास्त्री शुरुआत अर्थात २०१३ इस्वीसँ त्रैमासिक पत्रिका ‘मैथिल पुनर्जागरण प्रकाश’क नाशिक महाराष्ट्रसँ प्रकाशनक शुरुआत आ ताहि माध्यमसँ नाम अनुरुप पुनर्जागरणमे प्रथमतः मैथिलीक लिपि मिथिलाक्षर पुनर्जागरण आ क्रांति आनब, पुनः मैथिली अखबार सन दोसर असंभव काज पटल पर प्रस्तुत करब आ पुनः शिक्षा, संस्कृति, पहिचान एवं संस्कृति संरक्षणक लेल आर अनेक पुनर्जागरण ठानब आ एहि सभकेँ एकत्रित ‘मैथिल पुनर्जागरण प्रकाश फोरम’क अधिन आनि मजगूतीसँ फाउंडेशनक स्थापना करैत मूल उद्देश्यक पूर्ति हेतु कार्ययोजना पर प्रकाश देलनि आ ई कतेक आवश्यक अछि ताहि गुढ़ रहस्य पर प्रकाश डाललनि।
पुनः विचार भेलै जे मिथिलाक्षर साक्षरता अभियानक ठाम-ठाम इकाईक गठन कयल जाए, एहि लेल पटना इकाईक गठनक प्रस्ताव देल गेल आ सर्वसम्मतिसँ पटना इकाई लेल संयोजकक रुपमे वरिष्ठ अभियानी डाॅ विनय कर्णकेँ जिम्मेदारीक आग्रह करैत चयन कयल गेल एवं तत्काल ०९ सदस्यीय ‘पटना इकाई’ टीमक गठन कयल गेल जे एहि प्रकारसँ अछि -:
डाॅ विनय कर्ण ६७ (संयोजक), सुमित सौरभ ६८, अमृता शांभवी ६८, किशोर कुमार झा १४३, आनंद कुमार १५१, राहुल कर्ण १६७, शिवम कुमार झा २८३, यशोदा कुमारी २८६ आ अपूर्व कर्ण २९० केर रुपमे नामित भेल। एकरा विस्तारित करय केर निर्देश देल गेल।
आगामी ‘मिथिलाक्षर प्रवीण’ सम्मान समारोह शिघ्र करय पर विचार भेल। सुमित सौरभकेँ सेहो ‘समाचार बुलेटिन’ प्रस्तुतिक लेल अभिनंदन कयल गेलनि। सुमित सौरभ द्वारा धन्यवाद ज्ञापनक संग विचार गोष्ठी पर विराम लागल। अल्पाहारक बाद आर्ट गैलरीमे विभिन्न मिथालाक पारंपरिक पुरान धरोहर सभ, मिथिला पेंटिंग एवं गैलरीक संचालन कर्त्री अमृता शांभवी द्वारा अद्भुत कलाकारीक दृश्यावलोकनसँ सभ अभिभूत भेलाह।
पृष्ठ संख्या ०२ सेहो देखी।
