बीसवीं शताब्दीमे मिथिलाक्षर उदयक सूत्रधार मिथिलाक्षर साक्षरता अभियानक एग्यारहम स्थापना दिवसक उत्सव आरंभ भेल। सर्वविदित अछि जे ०९ अक्टूबरके मिथिलाक्षर साक्षरता अभियानक स्थापना दिवस मनाओल जाइत अछि जे ‘मिथिलाक्षर दिवस’क रुपमे जानल जाइत अछि। ई स्थापना दिवसक उत्सव १५ दिन पहिनेसँ शुरू होइत अछि आ २५ सितंबरसँ ०९ अक्टूबर ‘मिथिलाक्षर पक्ष’क नामसँ प्रसिद्ध अछि।
तऽ ई एहि बेरक मिथिलाक्षर पक्ष काल्हि २५ सितंबर, बुधसँ शुरु भेल जे ०९ अक्टूबर तक निरंतर मिथिला-मैथिलीक विभिन्न शैक्षणिक, सांस्कृतिक, धार्मिक आदि रंगमे धरताल मिथिला सहित देश-दुनियामे पसरल मिथिलाक्षर साक्षरता अभियानी मनेनाइ शुरू कयलनि।
एहि १५ दिवसक ‘मिथिलाक्षर पक्षमे मैथिल पुनर्जागरण प्रकाश’क समदिया सभ यद्यपि अधिकाधिक कवरेज करय केर प्रयास करताह, तथापि अभियान दिसिसँ समस्त अभियानीगणकेँ ई जानकारी देल जा रहल अछि जे अहाँ सभ एहि १५ दिनमे जे किछु प्रस्तुती आदि वा एहि मिथिलाक्षर पक्षक निमित्त उपक्रम करी, तकर जानकारी, छायाचित्र, छोट विडियो आदि 7480018873 ह्वाट्सएप नंबर पर भेजी। तकरा प्रकाशित करय केर प्रयास रहतै।
मैपुप्र समदियाकेँ अभियानक संरक्षक देवेन्द्र झा जानकारी देलनि जे एहि मिथिलाक्षर पक्षमे सभसँ पहिनो पन्द्रहो दिवस मिथिलाक्षर साक्षरता अभियानक फेसबुक समूह पर मिथिलाक्षर लेखनी अभियानीगण प्रस्तुत करथिन। पुनः तदजन्य विडियो आदिक प्रस्तुती होएत, लाइव आबि सेहो एहि मिथिलाक्षर उदयक एहि एग्यारह वर्षक यात्राक अनुभव व्यक्त करताह। तहिना विभिन्न प्रतिभावान कलाकार, वक्ता आदि अपन प्रस्तुती देताह एवं आओर विभिन्न कार्यक्रम आदिक प्रस्तुती होएत। सभगोटे अभियान आ मैथिल पुनर्जागरण प्रकाश (राष्ट्रीय मैथिली दैनिक) सँ जुड़ल रही।
