२५ सितंबरकेँ धरातल मिथिला एवं देश-विदेशमे पसरल अभियानीगण दीपोत्सव, मंगल कलश आदि अपन-अपन आस्था-धर्म अनुसार शुभारंभ कयलनि, जकर रंग-बिरंगक छवि शोसल मिडिया पर प्रदर्शित भेल, जे लोककेँ आकृष्ट कयलक, फलतः मिथिलाक्षरक चर्चा भेल।
२६ सितंबरकेँ मिथिलाक्षर पक्षक दोसर दिन संस्थापक अजय नाथ झा शास्त्री फेसबुकक मिथिलाक्षर साक्षरता अभियान समूह पर लाइव आबि बारह वर्षक अभियान यात्रा, एखनि तकक उपलब्धि, निर्धारित स्थान-मान-सम्मान प्राप्तिक मूल लक्ष्य, ताहिमे आबयवाला बाधा आ बाधा निवारणक उपाय आदिक चर्चा कय अभियानीगणमे ऊर्जाक संचार करय केर प्रयास कयलनि। पुनर्जागरण लेल प्रेरित कयलनि।
मिथिलाक्षर पक्षमे प्रतिदिन अभियानीगण हस्तलिखित मिथिलाक्षर पोस्ट करैत छथि। मुख्य मंच मिथिलाक्षर साक्षरता अभियानक फेसबुक समूह अछि, संगहि संग शोसल मिडियाक विभिन्न प्लेटफार्म पर पोस्ट एवं शेयर होइत अछि। दिनांक २७-०९-२०२४ अर्थात मिथिलाक्षर पक्षक तेसर दिन अभियानक संरक्षक इंद्रदेव चौधरी अपन प्रस्तुति फेसबुक लाइव आबि कऽ देलनि। भक्तिरसमे सराबोर मैयाक भजन मधुर एवं करुण स्वरमे परमानंदक अनुभूति प्रदान करयवाला छल, दर्शक-श्रोता सभ मंत्रमुग्ध रहथि।
एहि समारोहक चारिम दिन यानि २८ सितंबरकेँ संध्या कालीन कार्यक्रममे मिथिलाक्षर साक्षरता अभियानक अभियानी लोकनि बढिचढिकेँ भाग लेलथि आ अपन कविता, भजन मैथिली लोकगीत आदिक बहुत नीक ढंगसॅं प्रस्तुती कय कार्यक्रमकेँ सफल बनेलनि। कार्यक्रम जूम केर माध्यमसँ भेल, जकरा फेसबुकक मिथिलाक्षर साक्षरता अभियान समूह पर लाइव प्रदर्शित कयल गेल, संगहि संग सोशल मीडियाक सभ प्लेटफार्म पर शेयर काएल गेल, जाहि ठाम हजारों दर्शक एकरा देखि आनंदित भेलाह।
मिथिलाक्षर साक्षरता अभियानक उद्देश्य मिथिलाक्षर कोना सब घरमे प्रचलित होयत आ एकर ज्ञान सभकें भेटब अछि। अहि कार्यक्रमकेँ मिथिलाक्षर साक्षरता अभियानक संस्थापक मिथिला अजय नाथ झा शास्त्री शुरुआत कयलनि, संगहि ममता झा, संत कुमार मंडल, सुधीर यादव, कृष्ण कुमार, प्रेमलता झा, अशोक झा, उज्ज्वल कुमार, इन्द्र देव चौधरी, अपन-अपन उत्कृष्ट प्रस्तुती देलनि। खासकऽ संत कुमार मंडल अपन स्वाभिमानसँ ओतप्रोत रचित मिथिला-मैथिलीक सामयिक चिंतन पर मंत्रमुग्ध करयवाला स्वरसँ सभकेँ रोमांचित कय देलनि, जोश भरि देलनि।
कार्यक्रम, मिथिलाक्षर साक्षरता अभियानक उत्कृष्ट संरक्षक देवेन्द्र झा केर संचालनमे भेल, ओ कहलनि, इ प्रोग्राम १५ दिन धरि चलत आ जाहिमे आओर कतेक अभियानी गण, कलाकार, गायक-गायिका, कवि-कवियत्री आदि बढि-चढि कऽ भाग लेताह/लेतीह। व्यवस्था सहयोगमे संरक्षक नवीन झा छलथि। टेक्निकल विभाग दिपक आनंद मल्लिक हेंडल कय रहल छलथि, जाहिमे सहयोग दऽ रहल छलखिन संजय मिश्रा। वरिष्ठ संरक्षगका रुनू मिश्रा स्त्री वर्गक प्रस्तुतीक व्यवस्थापनमे लागल रहलीह।
