मिथिलाक लाल 14 सालक वैभव सूर्यवंशी बनेलनि 35 गेंदमे शतक, दिग्गज सभक प्रसंशा

जयपुर समदिया
*

राजस्थान रॉयल्ससँ खेलैत मिथिला क्षेत्रीय बिहारक समस्तीपुरक 14 वर्षीय वैभव सूर्यवंशी सोमकेँ आईपीएल आ टी20 क्रिकेटक इतिहासमे एकटा नव अध्याय जोड़लनि। सवाई मानसिंह स्टेडियम, जयपुरमे गुजरात टाइटन्स केर खिलाफ खेलल गेल मुकाबलामे ओ मात्र 38 गेंदमे 101 रनक विस्फोटक पारी खेललनि। एहि पारीमे ओ 7 चौका आ 11 छक्का जड़लथि, आ हुनकर स्ट्राइक रेट 265.79 रहल।

वैभव अपन शतक मात्र 35 गेंदमे पूरा कएलनि, जे आईपीएल इतिहासमे दोसर सभसँ तेज़ शतक अछि। हुनकासँ तेज़ शतक मात्र क्रिस गेल द्वारा लगायल गेल छल, जे 2013 मे 30 गेंदमे सेंचुरी पूरा कएलथि।

वैभव आब आईपीएलमे सबसँ तेज़ भारतीय शतकवीर बनि गेल छथि। एहिसँ पहिने ई रिकॉर्ड यूसुफ पठान (37 गेंद) केर नाम पर छल। एतबे नहि, ओ 14 वर्ष आ 32 दिनक उम्रमे शतक बना कऽ टी20 क्रिकेट इतिहासक सबसँ युवा शतकवीर बनि गेल छथि। एहिसँ पहिने ई रिकॉर्ड विजय ज़ोलक नाम पर छल, जे 2013 मे 18 वर्ष आ 118 दिनक उमरिमे महाराष्ट्रक लेल शतक बनौने छल।

वैभव 17 गेंद पर अर्धशतक सेहो पूरा कऽ देलक, जे आईपीएल इतिहासक पाचम सबसँ तेज अर्धशतक अछि। संगहि ओ आईपीएलमे अर्धशतक बनाबऽवाला सबसँ युवा खिलाड़ी सेहो बनि गेल अछि।

वैभवक ऐतिहासिक पारी पर कतेको दिग्गज खिलाड़ी सब प्रतिक्रिया देलनि अछि। सचिन तेंदुलकर लिखलनि, “वैभवक बेखौफ रवैया, ओकर बैट स्पीड, गेंदक लेंथ केर जल्दी पहचानब आ गेंदक पाछू अपन पूरा ऊर्जा ट्रांसफर करब — इएह एहि शानदार पारीक असली राज छल। 38 गेंद पर 101 रन — शानदार प्रदर्शन!”

यूसुफ पठान कहलक, “नौजवान वैभव सूर्यवंशीकेँ सबसँ तेज भारतीय आईपीएल शतक तोड़बाक लेल बधाई! आओर विशेष बात ई अछि जे ओ राजस्थान रॉयल्सक लेल ई कएलक — जेना कहियो हम कएने छलौंह। एहि फ्रेंचाइज़ीमे सचमुच युवा सभकेँ निखारबाक जादू अछि। आगू लंबा सफर तय करबाक अछि, चैंपियन!”

युवराज सिंह एक्स पर लिखलखिन “14 सालक उम्रमे अहाँ की करैत छलौंह ? ई बच्चा संपूर्ण विश्वक बेहतरीन गेंदबाज सबहक सामना कऽ रहल अछि! वैभव सूर्यवंशी — एहि नामकेँ याद रखू! अगिला पीढ़ीकेँ एहेन चमकल देखब गर्वक बात अछि!”

शिखर धवन ट्वीट कएलनि, “14 सालक उम्रमे सबसँ तेज भारतीय IPL शतक — वैभव सूर्यवंशीक विशेष पारी। यशस्वी, तोहर 40 गेंदमे 70 रन सेहो कमाल रहल। अहाँ दुनूक ओपनिंग साझेदारी जादुई रहल।”

वैभव आ यशस्वी जायसवालक बीच भेल 166 रनक साझेदारी राजस्थान रॉयल्स केर इतिहासक सबसँ पैघ ओपनिंग साझेदारी बनि गेल अछि। एहिसँ पहिने ई रिकॉर्ड जोस बटलर आ देवदत्त पडिक्कल (155 रन, 2022) केर नाम पर छल।

वैभव आईपीएल करियरक शुरुआत शार्दुल ठाकुरके गेंद पर छक्का मारिकय कएने छल। एखनि तक खेलल तीन मैचमे हुनकर 151 रन अछि, औसत 75.50 आ स्ट्राइक रेट 222.05 अछि। मिथिला क्षेत्रीय बिहारक समस्तीपुरक वैभव 12 साल आ 284 दिनक उम्रमे प्रथम श्रेणी क्रिकेटमे डेब्यू कयने रहथि। ओ इंडिया U-19 टीम सँ ऑस्ट्रेलियाक खिलाफ शतक लगौलक आ अंडर-19 एशिया कपमे सेहो बेहतरीन प्रदर्शन कयने छलथि।