तीन दिवसीय 53म मिथिला विभूति पर्व समारोह तीन नवंबरसँ होयत। आयोजनक रूपरेखा तय करबाक उद्देश्यसँ मंगलदिन सँझुका पहर विद्यापति सेवा संस्थानक आमसभा संस्थानक प्रधान कार्यालय परिसरमे भेल। संस्थानक अध्यक्ष सह कामेश्वर सिंह दरभंगा संस्कृत विश्वविद्यालयक पूर्व कुलपति प्रो शशिनाथ झा केर अध्यक्षतामे आयोजित आमसभाक बैसारमे प्रत्येक वर्षक भांति एहू साल कवि कोकिल विद्यापति केर निर्वाण दिवस कार्तिक धवल त्रयोदशी तिथि तदनुसार तीन नवंबरसँ तीन दिवसीय समारोह आयोजित करबाक निर्णय लैत सफल आयोजन लेल विभिन्न समितिक गठन कयल गेल।
समारोहक मुख्य संरक्षक ललित नारायण मिथिला विश्वविद्यालयक कुलपति प्रो संजय कुमार चौधरीकें बनाओल गेल। जखनि कि मिथिलाक सामाजिक, साहित्यिक आ सांस्कृतिक संरक्षण ओ संवर्द्धन लेल समर्पित एहि गौरवशाली आयोजन केर संरक्षक मंडलमे कामेश्वर सिंह दरभंगा संस्कृत विश्वविद्यालयक कुलपति प्रो लक्ष्मी निवास पांडेय, शिक्षाविद् डा संत कुमार चौधरी, एमएलएसएम कालेजक प्रधानाचार्य डा शंभु कुमार यादव, महात्मा गांधी शिक्षण संस्थानक चेयरमैन हीरा कुमार झा, अहमदाबादक प्रवासी मैथिल संतोष कुमार मिश्र सहित ट्राई कलर प्रोपर्टीज लिमिटेड केर कार्यकारी निदेशक रंजन कुमार झाकें सर्वसम्मतिसँ मनोनीत कयल गेल।
आयोजन लेल विगत साल गठित समितिकें सर्वसम्मतिसँ एहू साल कायम रखैत एकर सलाहकार समितिक अध्यक्ष पं कमला कांत झा, स्वागताध्यक्ष सुप्रीम कोर्टक ओजस्वी अधिवक्ता आ मनीगाछी प्रखंडक उजान गामवासी आशुतोष मिश्र, स्वागत महासचिव प्रो जीवकांत मिश्र बनाओल गेलाह। आयोजन समितिक अध्यक्ष सर्वसम्मति सँ प्रो शशिनाथ झाकें आ उपाध्यक्ष क्रमशः डा श्रीपति त्रिपाठी, डा महानंद ठाकुर, प्रो रमेश झा , अमरेन्द्र झा आ विनोद कुमार झाकें मनोनीत कयल गेल। कोषाध्यक्षक कमान डा गणेश कांत झाकें सौंपल गेल। जखनिकि आय-व्यय पर्यवेक्षणक प्रभारी प्रवीण कुमार झाकें बनाओल गेल।
संस्थानक मुख पत्रिका ‘अर्पण’ केर संपादक एकबेर फेर डा महेद्र नारायण राम आ प्रवीण कुमार झाकें संयुक्त रूपसँ बनाओल गेल। कवि सम्मेलनक संयोजक लेखक रमेश, सह संयोजक प्रवीण कुमार झा आ विचार संगोष्ठीक प्रभारी मणिकांत झा बनाओल गेलाह। शोभा यात्राक संयोजक विनोद कुमार झा आ सह संयोजक क्रमशः प्रो. विजय कांत झा, डा महानंद ठाकुर ओ प्रो चंद्रशेखर झा बूढ़ा भाईकें बनाओल गेल।
समारोहमे देल जाय बला विभिन्न सम्मानक लेल पं कमला कांत झाक अध्यक्षतामे तीन सदस्यीय कमेटीक गठन कयल गेल। कमेटीक आन सदस्यक रूपमे वरिष्ठ साहित्यकार डा महेन्द्र नारायण राम आ प्रवीण कुमार झा शामिल कयल गेलाह।
सांस्कृतिक कार्यक्रम आयोजन लेल पं कमलाकांत झाक संयोजनमे गठित समितिमे प्रो चन्द्रनाथ मिश्र आ प्रो जीवकांत मिश्रकेँ पूर्ववत शामिल कयल गेल। मीडिया संयोजन आ कार्यालय सचिव केर प्रभार प्रवीण कुमार झाकें एकबेर फेर सर्वसम्मतिसँ भेटल। जखनिकि प्रो चंद्रशेखर झा बूढ़ाभाईकें मीडिया दीर्घाक सह संयोजक बनाओल गेल।
आशीष चौधरी केर संयोजनमे गठित सोशल मीडिया समितिमे मणिभूषण राजू आ पुरूषोत्तम वत्स शामिल कयल गेलाह। आयोजनमे महिला दीर्घाक समुचित व्यवस्थापन लेल गठित समिति केर बागडोर डा सुषमा झा आ डा ममता ठाकुरकें संयुक्त रूपसँ सौंपल गेल। एहि दीर्घाक सह संयोजिका क्रमशः डा उषा चौधरी आ स्वर्णिम किरण झा बनाओल गेलीह।
विद्यापति सेवा संस्थानक महासचिव डा बैद्यनाथ चौधरी बैजू बतेलनि जे बैसारमे उपस्थित संस्थान परिवारक सभ सदस्य लोकनि सर्वसम्मतिसँ 53म मिथिला विभूति पर्व समारोहक तैयारीक संग अभियान चला एहि समारोहमे युवा, महिला आ प्रवासी मैथिलक सक्रिय सहभागिता सुनिश्चित करैत देशव्यापी सांस्कृतिक एकजुटता कायम करबाक संकल्प लेलनि।
मिथिला चित्रकलाकें संरक्षित करबाक उद्देश्यसँ समारोहक दौरान विभिन्न प्रतियोगिताक भव्य आयोजन पर सेहो सबहक सहमति बनल आ एहि काज लेल मणिभूषण राजू केर संयोजनमे प्रवीण कुमार झा, आशीष चौधरी आ पुरुषोत्तम वत्स केर एकटा कमेटी गठित कयल गेल। समारोहक दौरान शांति व्यवस्था कायम करबा लेल बालेंदु झा आ मनीष झा रघु केर संयोजनमे समिति गठित कयल गेल।
मंच व्यवस्थाक कमान जय नारायण साह आ मनीष झा रघुकें दैत आवासन व्यवस्थापन लेल दुर्गानंद झा, प्रेमचंद्र चौधरी, आशीष चौधरी आ पुरुषोत्तम वत्सक कमिटी केर संगहि चौधरी बैद्यनाथ राय, प्रो विजयकांत झा, हरिकिशोर चौधरी ओ नवल किशोर झाकें भोजन आ जलपान व्यवस्थाक जवाबदेही देल गेल।
प्रचार-प्रसार लेल प्रवीण कुमार झा केर संयोजनमे गठित पाँच सदस्यीय समितिमे आशीष चौधरी, मणिभूषण राजू, पुरुषोत्तम वत्स आ रामनरेश चौधरी शामिल कयल गेलाह।
अध्यक्षीय संबोधनमे प्रो शशिनाथ झा लगातार तीन दिन धरि आयोजित होबय बला एहि साहित्यिक, सामाजिक आ सांस्कृतिक महाकुम्भक सफलता लेल सभसँ समवेत भ’ सामूहिक प्रयास करबाक आह्वान कयलनि।
बैसारमे पं कमलाकांत झा, डा बुचरू पासवान, डा श्रीपति त्रिपाठी, प्रो जीवकांत मिश्र, मणिकांत झा, लेखक रमेश, प्रवीण कुमार झा, प्रो विजय कांत झा, डा गणेश कांत झा, विजय शंकर झा, डा उदय कांत मिश्र, नवल किशोर झा, वैद्य गणपति झा, हरिकिशोर चौधरी, डा महानंद ठाकुर, डा सुषमा झा, डा ममता ठाकुर आदि केर उल्लेखनीय उपस्थिति रहलनि।
